एमालेका कारण सदनको काम-कारबाही रोकियो भन्‍ने प्रचार निरर्थक : नेम्वाङ

फाइल तस्‍बिर

काठमाडौँ - नेकपा एमाले संसदीय दलका उपनेता सुवासचन्द्र नेम्वाङले आफूहरूको विरोधकाबीच एक सेकेण्ड पनि सदनको कामकारबाही नरोकिएको स्पष्ट पारेका छन् । शनिबार संसद् भवन नयाँ बानेश्वरमा बसेको एमाले संसदीय दलको बैठकमा नेम्वाङले एमालेका कारण सदनको काम कारबाही रोकियो भन्ने प्रचार निरर्थक रहेको बताए । एमालेका कारणले एक सेकेण्डपनि सदनको कामकारबाही नरोकिएको उनले दाेहोर्‍याए ।

नेम्वाङले सरकारले नै कुनै विधेयक नल्याएर सदनका कामविहीन बनाएको आरोप लगाए। उनले सरकारले बिजनेश नदिएका कारण नै सदनले सिन्को भाच्न नसकेको तर्क गरे। नेम्वाङले सदन सञ्चालनमा सभामुखले एमालेप्रति भेदभाव गरेको र कार्यव्यवस्थामा पनि एमालेसँग कुनै छलफल नै नभएको जिकिर गरे।

नेम्वाङले ८८ दिनपछि मात्र पूर्णता पाएको वर्तमान सरकारले जनता र देशप्रति कुनै काम गर्न नसकेको धारणा राखे । नेम्वाङले सदनमा पेश भएका विधेयक फिर्ता लिएर पछिल्लो समय सरकार उल्टोबाटोमा हिडेको तर्क गरे ।

उनले अहिले मुलुक एमालेमय भएको भन्दै ढुक्क भएर जनताको माझ जान सांसदहरूलाई सुझाव दिए। बैठकमा एमाले अध्यक्ष एवं एमाले संसदीय दलका नेता केपी शर्मा ओली भने अनुपस्थित थिए ।