माधव नेपाल र दाहालमा लेण्डुप दोर्जेको मानसिकता रहेको ओलीको आरोप

काठमाडौँ – नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले आफूनेतृत्वको सरकारले चुच्चे नक्सा जारी गरेपछि सरकार ढाल्ने खेल सुरु भएको बताएका छन् । एमाले सिन्धुपाल्चोक–काठमाडौं सम्पर्क मञ्चको बृहत कार्यकर्ता भेलालाई सम्बोधन गर्दै अध्यक्ष ओलीले यस्तो बताएका हुन् । 

आफ्नो सरकारले कालापानी, लिपुलेक र लिम्पियाधुरा समेटेर देशको नक्सा जारी गरेपछि आफूविरुद्ध पुष्पकमल दाहाल र माधव नेपालले नेपाली कांग्रेससँग मिलेर विदेशीसँग साँठगाँठ सुरु गरेको ओलीको जिकिर छ । 

उनले दाहाल र नेपालमा सिक्किमका लेण्डुप दोर्जेको मानसिकता रहेकोसमेत आरोप लगाए । ‘जब नक्सा छापियो, यिनको मुटुमात्र होइन सिंगै छाति चिरियो, कलेजो, फोक्सो फुत्त बाहिरि निस्कियो । नक्सा जारी गरेर केपी ओलीले भारतसँग सम्बन्ध बिगार्यो भने,’ ओलीले भने, ‘हाम्रो जमिन छाडेर भारतसँग सम्बन्ध सुधार्ने ? हामीले नक्सा छाप्दा सम्बन्ध बिगार्यो भन्नेहरू लेण्डुप दोर्जे मानसिकताका हुन् । उनीहरू कम्फर्टेबल सरकार बनाउँछौ भन्दै भारतसामु लम्पसार परे ।’