मुख्यमन्त्री पाण्डेले कात्तिक २२ गते विश्वासको मत लिने

फाइल तस्‍बिर

हेटौंडा - बागमती प्रदेशका मुख्यमन्त्री राजेन्द्र पाण्डेले कात्तिक २२ गते प्रदेश सभाबाट विश्वासको मत लिने भएका छन् । विश्वासको मत लिने प्रस्तावको सूचना मुख्यमन्त्री पाण्डेले प्रदेशसभा सचिवालयमा दर्ता गराइसकेका छन् ।

यही कात्तिक १६ गते विश्वासको मत लिने तयारी गरेका पाण्डेले सभामुख सानुकुमार श्रेष्ठको समय नमिलेपछि तिहारपछि विश्वासको मत लिने लागेका हुन् । बागमती प्रदेशको ५९ सांसदहरूको समर्थनमा बहुमत पुर्‍याउन सक्ने दाबीसहित पाण्डे मुख्यमन्त्रीमा कात्तिक ११ गते नियुक्त भएका थिए ।

कात्तिक २२ गते विश्वासको मतको प्रक्रिया सुरु भएर सोही दिन टुंगाउने तयारी भएको सरकारका प्रवक्ता कृष्ण खनालले जानकारी दिए । उनकाअनुसार विश्वासको मत पाएसँगै प्रदेशको मन्त्रीपरिषद्ले पूर्णता पाउनेछ । बागमती प्रदेशमा अहिले ८ मन्त्रालय रहेको छ ।