एन आई सी एशियाले सार्वजनिक गर्‍यो त्रैमासको वित्तीय विवरण

काठमाडौँ- एन आई सी एशिया बैंक लिमिटेडले आर्थिक बर्ष २०७८/७९ को पहिलो त्रैमासको वित्तीय विवरण प्रकाशित गरेको छ । 

मुलुकभर फैलिएका शाखा सञ्‍जालहरूमार्फत एन आई सी एशिया बैंक लिमिटेडले चालू आ.व. २०७८/७९ को पहिलो त्रैमासिक अपरिष्कृत वित्तीय विवरण प्रकाशित गरेको हो । 

बैंकिङ्ग क्षेत्रको अधिकांश वित्तीय सूचकांकहरूमा अग्रणी स्थान ओगटेको यस बैंकका समग्र वित्तीय विवरणका परिसूचकहरू उत्साहजनक देखिन्छ । यस बैंकले आ.व. २०७८/७९ को पहिलो त्रैमासिक व्यवसायतर्फको कर्जामा वार्षिक विन्दुगत आधारमा ३६ प्रतिशत (रू. ७४ अर्ब) ले वृद्धि गरी कुल कर्जा रकम रू. २७७.८५ अर्ब  पुर्याउन  सफल भएको छ ।

साथै, निक्षेपतर्फ वार्षिक विन्दुगत आधारमा २६.९९ प्रतिशत (६५.२९ अर्व) ले वृद्धि गरी कुल निक्षेप संकलन ३११.४५ अर्ब  पुर्याउन बैंक सफल भएको छ  बैंकले यस त्रैमासमा खुद मुनाफातर्फ रू. १.१८ अर्ब आर्जन गर्न सफल भएको छ, जुन अन्य वाणिज्य बैंकहरूमध्ये सबैभन्दा बढी हो । 

यसैगरी बैंकको स्व-पुँजी प्रतिफल (आरओइ) २१.३९ प्रतिशत रहेको छ । यस बैंकले वार्षिक प्रति सेयर आम्दानी ३९.६५ आर्जन गर्न बैंक सफल भएको छ ।जुन निजी क्षेत्रका अन्य वाणिज्य बैंकहरूमध्ये सबैभन्दा बढी हो ।

कोभिड-१९ को विषम परिस्थितिमा समेत बैंकले कर्जा असुलीमा निकै उत्साहजनक नतिजा हासिल गर्न सफल भई निष्कृय कर्जालाई पहिलो त्रयमाससम्ममा ०.४९ प्रतिशतमा सीमित राख्न बैंक सफल भएको छ ।