अवैध सुनसहित काठमाडौंबाट एक जना पक्राउ

काठमाडौँ – अवैध सुनसहित प्रहरीले एक जनालाई आइतबार राति पक्राउ गरेको छ । पक्राउ पर्नेमा रुपन्देही सैनामौना नगरपालिका– ६ घर भई हाल काठमाडौं मित्रनगरस्थित होटल परेली डिलक्समा बस्ने ३५ वर्षीय बसन्त लम्साल रहेका छन् । 

महानगरीय प्रहरी प्रभाग गोंगबुबाट खटिएको प्रहरीले उनलाई अवैध रूपमा ल्याएको ३ सय ग्राम तौलको ६ थान सुनजस्तो देखिने पहेँलो धातुको बालासहित पक्राउ गरेको हो । बुद्धमार्गस्थित सडकमा जाँच गर्नेक्रममा उनको साथबाट उक्त धातु फेला पारी पक्राउ गरेको प्रहरीले जनाएको छ ।

उनलाई उक्त धातुसहित आवश्यक कारबाहीका लागि त्रिभुवन विमानस्थल भन्सार कार्यालय गौचरमा पठाइएको महानगरीय प्रहरी प्रभाग गोंगबुले जनाएको छ ।