अवैध लागूऔषधसहित दुई युवक पक्राउ

सिन्धुली – अवैध लागूऔषधसहित प्रहरीले दुई जनालाई पक्राउ गरेको छ । पक्राउ पर्नेमा सिरहा नगरपालिका–१८ बस्ने २५ वर्षीय मनोजकुमार कुर्मी र सर्लाही बागमती नगरपालिका–११ बस्ने २३ वर्षीय डेनिस बानिया रहेका छन् ।

सिराहाबाट काठमाडौंतर्फ आउँदै गरेको बा.५ ख ८९०४ नम्बरको हायस गाडीमा सवार कुर्मी र सर्लाहीबाट काठमाडौंतर्फ आउँदै गरेको ना. १ ज ७४३९ नम्बरको गाडीमा सवार बानियालाई प्रहरीले सिन्धुलीको कमलामाई नगरपालिका–६ माझिटारबाट पक्राउ गरेको हो ।

उक्त सडकस्थित प्रहरी चेक पोष्टमा खटिएको प्रहरीले जाँच गर्नेक्रममा कुर्मीलाई ४१ ग्राम ३ सय ९० मिलिग्राम अवैध लागूऔषध गाँजा र १ सय एमएलको २ बोतल लागूऔषधजस्तो देखिने कोडिवेल लेखिएको झोल पदार्थ र बानियालाई १ सय एमएलका २ बोतल विनसिरेक्स लेखिएको लागूऔषधजस्तो देखिने पदार्थसहित फेला पारी पक्राउ गरेको हो । पक्राउ परेकामाथि प्रहरीले थप अनुसन्धान गरिरहेको जनाएको छ ।