कुनै व्यक्तिको विरोधी गतिविधिले पार्टी एकतालाई भत्काउन सक्दैन : दाहाल

फाइल तस्बिर

काठमाडौं : नेकपाका कार्यकारी अध्यक्ष पुष्पकमल दाहालले पार्टी एकतालाई कसैले भत्काउन नसक्‍ने बताएका छन् । सोमबार एक विज्ञप्‍ति जारी गर्दै दाहालले कुनै व्यक्तिको पार्टी विरोधी गतिविधिले एकीकृत पार्टीको संरचना र पार्टी एकतालाई भत्काउन नसक्‍ने बताएका हुन् ।

'राष्ट्रको समृद्धि र नेपाली कम्युनिष्ट आन्दोलनको भविष्यका निम्ति पार्टी एकतालाई कमजोर पार्ने सबै प्रकारका प्रवृति र तत्वहरुका विरुद्ध एकतावद्ध भएर उभिन तथा कुनै व्यक्तिको पार्टी विरोधी गतिविधिले एकीकृत पार्टीको संरचना र पार्टी एकतालाई भत्काउन सक्ने छैन' दाहालद्वारा जारी विज्ञप्तिमा भनिएको छ 'त्यसप्रकारको कुनै भ्रमात्मक प्रचारमा नपर्न पनि म सबैलाई अपील गर्दछु ।'

पार्टी एकताबद्ध भएकाले कुनै व्यक्तिको पार्टी, राष्ट्र र जनता विरोधी कार्यले नेकपाको एकतालाई कुनै तात्विक असर नपर्ने दाहालले विज्ञप्तिमा उल्‍लेख गरेका छन् । 'हाम्रो पार्टीका अध्यक्षसमेत रहनुभएका प्रधानमन्त्री केपी शर्मा ओलीले चालेको प्रतिनिधि सभा विघटनको असंवैधानिक, अलोकतान्त्रिक, निरंकुश, पश्चगामी एवम् स्वेच्छाचारी कदमलाई हिजो बसेको स्थायी कमिटीको बैठकले विरोध एवम् भर्त्सना गर्दछु' दाहालले विज्ञप्तिमा भनेका छन् 'पूर्ण रुपमा अस्वीकार गर्ने र पार्टी अध्यक्ष कमरेड ओलीलाई अनुशासनको कारबाहीका निम्ति स्पष्टिकरण माग्‍ने निर्णय गरेको बिषय सार्वजनिक भइसकेको छ ।'