प्याकिङ गर्ने झन्झटले नकिन्‍नुस् प्याकेटको मसला

काठमाडौँ -  प्याकिङ गर्ने झन्झटले धेरै दिदीबहिनीले तिहारका लागि प्याकेटको भाई मसला किन्छन् । ती प्याकेटमा भएका मसला हामीले तिर्नेभन्दा निकै कम मुल्यको हुन्छ । तर, हामी भने जुन मसलाको प्याकेटलाई राम्रोसँग सजाइएको छ, त्यही किन्छौँ । त्यसभित्र राखिने मसलाबारे कमैमात्र हेक्का राख्छौँ । र, पछि मसला खोलेर हेर्दा आफू ठगिएको पत्तै पाउँदैनौँ । 

यसरी मसला किनेर ठगिनुभन्दा घरमा आफैँले मसला बनाउन सकिन्छ । जुन बजारको प्याकेटवाला मसलाभन्दा सस्तो र गुणस्तर हुन्छ । घरमा आफैँले मसला बनाउँदा आवश्यक पर्ने ओखर, काजु, बदाम, किसमिस, ल्वाङ, सुकमेल, मिस्री, छोकडा, ओखर, मखनालगायत सामाग्री छुट्टाछुट्टै किन्‍नुस्पर्छ ।

आवश्यकता अनुसार किनिएका ती मसलालाई आफ्नो तरिकाले विभिन्‍न साइजमा प्याकिङ गर्न सकिन्छ । मसला प्याकिङ गर्ने थालीदेखि बकेटसम्म बजारमा जताततै पाइन्छ । यो पनि हामीले सस्तो मुल्यमा नै पाउन सक्छौँ । 

तिहारमा प्रयोग हुने मसला लामो समयसम्म बिग्रिँदैन । यसलाई लामो आयुका प्रतीक पनि मानिन्छ । साथै भाइमसलामा प्रयोग हुने यी मसलाहरू स्वास्थ्यका लागि लाभदायक हुन्छन् । तर, मसला किन्दा र दिँदा आफ्ना दाजुभाइको स्वास्थ्यको ख्याल राख्नुपर्छ ।

आफ्ना दाइभाइको स्वास्थ्य अवस्था हेरेर मसला प्याकिङ गर्नुपर्छ । धेरैलाई आजभोलि मधुमेहको समस्या छ । आफ्ना मधुमेह भएका दाई भाईलाई मसला प्याकिङ गर्दा विचार पुर्‍याउनुपर्छ । उनीहरूको स्वास्थ्यस्थितीको ख्याल राख्नुपर्छ । उनीहरूलाई गुलिया र स्वास्थ्यलाई हानी गर्ने खालका मसला हालिदिनु हुँदैन ।

मिस्री र बजारिया चकलेट उनीहरूको मसलाको प्याकेटमा हालिदिनु हुँदैन । चाडपर्वमा बजारिया मिठाइबाट आफू पनि बच्नुपर्छ र आफन्तलाई पनि बचाउनुपर्छ ।