बार अध्यक्ष श्रेष्ठको कार्यकक्षमा तालाबन्दी गर्ने वकिलहरूको चेतावनी

काठमाडौँ - स्वतन्त्र राष्ट्रिय कानून व्यवसायीमा आबद्ध वकिलहरुले बार अध्यक्ष चण्डेश्वर श्रेष्ठको कार्यकक्षमा तालाबन्दी गर्ने चेतावनी दिएका छन् ।

प्रधानन्याधीशको राजीनामा माग गर्दै नेपाल बारले गरेको आन्दोलन अपूर्ण भएको भन्दै उनीहरुले मंगलबार बार अध्यक्ष श्रेष्ठको कार्यकक्षमा तालाबन्दी गर्ने चेतावनी दिएका हुन् । प्रधानन्यायाधीशले राजीनामा दिने भन्दा पनि महाअभियोग लगाएर कारबाही गर्नुपर्ने उनीहरुको भनाई छ । 

बारले आन्दोलन अपूर्ण रहेको र यसलाई पूर्ण गर्नका लागि स्वतन्त्र राष्ट्रिय कानून व्यवसायीहरुले मंगलबारबाट तालाबन्दीसहित विरोध गर्ने स्वतन्त्र राष्ट्रिय कानून व्यवसायी अभियानका महासचिव कृष्ण प्रसाईले बताए । 

उनीहरुले न्यायालयमाथिको राजनीतिक हस्तक्षेपको विरोधमा संघर्ष जारी रहने जनाएका छन् । यसअघि पनि उनीहरुले सेतोपट्टी बाधेर प्रधानन्यायाधीशको राजीनामाले मात्र समस्या समाधान नहुने बताउदै आएका थिए ।