संयुक्त राष्ट्र संघका सहायक महासचिव सन्डर्स र प्रधान सेनापति शर्माबीच भेट

काठमाडौँ – संयुक्त राष्ट्र संघका सहायक महासचिव (एएसजी)  क्रिस्चियन सन्डर्स र नेपालका प्रधान सेनापति प्रभुराम शर्माबीच शिष्टाचार भेट भएको छ । सोमबार काठमाडौंस्थित सैनिक मुख्यालयमा सन्डर्स र शर्माबीच भेट भएको हो ।

संघद्वारा हरेक चार वर्षमा  प्रतिपूर्ति दलको समीक्षाका लागि गरिएको चौथो वार्षिकका सम्बन्धमा छलफल तथा निरीक्षणका लागि सन्डर्सको नेतृत्वमा निरीक्षण टोली सोमबार नेपाल आएको हो । टोलीलाई उपरथी सीताराम खड्काले  त्रिभुवन अन्तर्राष्ट्रिय विमानस्थलमा स्वागत गरेका थिए ।

दुई दिने निरीक्षण भ्रमणमा रहने उनले सोमबार प्रधान सेनापति प्रभुराम शर्मासँग शिष्टाचार भेट गरेका हुन् । मंगलबार सन्डर्सले पाँचखालस्थित वीरेन्द्र शान्तिकार्य तालिम केन्द्रको भ्रमण तथा रक्षामन्त्री र परराष्ट्रमन्त्रीसँग शिष्टाचार भेट गरी मंगलबार नै टोली स्वदेश फिर्ता हुने कार्यक्रम रहेको सेनाले जनाएको छ ।