नेपाली शान्ति सैनिकद्वारा विपन्न महिलालाई सामग्री प्रदान

काठमाडौँ – मिनस्का मिसनमा रहेको नेपाली सेना, रणशेर गण तेश्रो डफ्फाले अफ्रिकाको बम्बरी सहरका विपन्न तथा एकल महिलालाई सिलाइ बुनाइमा आवश्यक सामग्री प्रदान गरेको छ । 

डफ्फाले अफ्रिकाको बम्बरी सहरस्थित एकल रआर्थिक अवस्था कमजोर रहेका महिलाको आर्थिक अवस्था सुधार गर्न बम्बरीस्थित नगर प्रमुख कार्यालयमा कात्तिक १५ गते स्थानीय प्रशासनसँगको समन्वयमा कपडा सिलाउने हाते र खुट्टाले चलाउने मेशिन, कैंची, सियो र धागो तथा कोभिड–१९ रोकथामका सुरक्षात्मक सामग्री वितरण गरेको हो । यस्तै नेपाली शान्ति सैनिकहरूले द्वन्द्वग्रस्त मुलुकको संवेदनशील इलाकामा सक्रिय रही जिम्मेवारीसहित मानवीय सेवा गरेको नेपाली सेनाले जनाएको छ । 

‘स्थानीय समुदायलाई लक्षित गरी सञ्चालन गरिएका यस्ता कार्यबाट स्थानीय निकाय तथा समुदाय र शान्ति सैनिकहरूबीच विश्वासको वातावरण सिर्जना भई आपसी सम्बन्ध थप प्रगाढ हुने देखिन्छ,’ सेनाले जारी गरेको विज्ञप्तिमा उल्लेख छ । सिलाइ बुनाइ सामग्री हस्तान्तरण कार्यक्रममा स्थानीय जनप्रतिनिधिको उपस्थिति थियो ।