‘सूर्यवंशी’ले ततायो नेपाली निर्मातालाई, तोक्न थाले प्रदर्शन मिति

काठमाडौँ- बलिउड फिल्म ‘सूर्यवंशी’को व्यापारले नेपाली निर्मातालाई उक्साउन थालेको छ । तिहारको छेको पारेर रिलिज भएको फिल्मले भारतसँगै नेपालमा पनि हाउसफुलको व्यापार गरेपछि दर्शक आउने ÷नआउने दुविधामा रहेका नेपाली निर्माताको मनोबल बढाएको छ । डेढ वर्षदेखि तयार रहेर पनि फिल्म रिलिज गर्ने हिम्मत जुटाउन नसकेका निर्माताले फिल्म रिलिजको मिति तोक्न थालेका छन् । 

सोमबार यसको सुरुवात गरे निर्माता अर्जुनकुमारले । प्रदर्शनका लागि ठिक्क परेको समयमा महामारी आएपछि रोकिएको ‘चपली हाइट ३’ निर्माता कुमारले पुस २ गते रिलिज गर्ने घोषणा गरेका छन् । उनले दसैँ र तिहारमा नै फिल्म रिलिज गर्ने जमर्को गरे पनि दर्शक आउने कुरामा ढुक्क नभएपछि हच्किएका थिए । अहिले ‘सूर्यवंशी’ले भरमार व्यापार गरेपछि उनले धैर्य तोडेका हुन् । यो फिल्ममा महेश त्रिपाठी, स्वस्तिमा खड्का र सुपुष्पा भट्टको मुख्य अभिनय रहेको छ । 

सोमबार नै प्रदीप खड्का अभिनीत ‘प्रकाश’ले पनि प्रदर्शन मिति सार्वजनिक गरेको छ । यो फिल्मले वैशाखको कुनै मितिमा प्रदर्शन हुने जानकारी गराएको छ । यकिन मिति भने घोषणा गरिसकेको छैन । यसअघि नै ‘ए मेरो हजुर ४’ ले चैत अन्तिममा सार्वजनिक हुने घोषणा गरिसकेको छ । भदौ १७मा सार्वजनिक हुने घोषणा गरेको फिल्म महामारीको दोस्रो लहरपछि रोकिएको थियो । 

‘लप्पन छप्पन २’ले पनि प्रदर्शन मिति घोषणा गर्ने क्रमलाई निरन्तरता दिँदै शिवरात्रीलाई प्रदर्शन मिति बुक गरेर बसेको छ । अघिल्लो वर्षको शिवरात्रीमा प्रदर्शन हुने घोषणा गरेको फिल्म सरेर नयाँ वर्षमा पुगेको थियो । यो पटक पनि महामारीले दपेटेपछि रोकिन बाध्य भएको थियो । अहिलेलाई यो फिल्म फागुन १३ मा प्रदर्शन हुने चर्चा छ तर पुस १५ देखि यसका निर्देशक मुकुन्द भट्ट अर्को फिल्मको सुटिंगका लागि विदेश जाने तरखरमा छन् । फेरि पनि यो फिल्म फागुनमा  प्रदर्शन हुनेमा नै शंका छ । यसैगरी दीपेन्द्र के खनालले पनि आउँदो वर्षको वैशाख ३० मा ‘चिसो मान्छे’ प्रदर्शन गर्ने घोषणा गरेका छन् ।