व्यवसायीलाई अनावश्यक दुःख नदिन सुरक्षा निकायलाई गृहमन्त्रीको निर्देशन

काठमाडौँ – गृहमन्त्री बालकृष्ण खाणले व्यापार व्यवसायको लागि सहज वातावरण बनाउन प्रदेश नम्बर २ को सुरक्षा निकायलाई निर्देशन दिएका छन् । मंगलबार जनकपुर उद्योग वाणिज्य संघको ज्ञापन पत्र बुझ्दै मन्त्री खाणले उक्त निर्देशन दिएका हुन् ।

कोभिडका कारण अर्थतन्त्र शिथिल भइरहेको उल्लेख गर्दै उद्योग व्यवसायका लागि सहज वातावरण बनाउन प्रदेश नम्बर २ को सुरक्षा निकायलाई उनले निर्देशन दिए । उनले उद्योग क्षेत्रमा राष्ट्रव्यापी रूपमा समस्याहरू देखापरेको र ती समस्याहरूलाई समाधान गर्न वर्तमान सरकार तत्पर रहेको बताए ।

माल, समान ल्याउने क्रममा व्यापारीहरूलाई अनावश्यक दुःख नदिन सुरक्षा निकायका प्रतिनिधिहरूलाई उनले निर्देशन दिए । मन्त्री खाणले भाषा, संस्कृतिको विकासका लागिसमेत सरकार गम्भीर रहेको र सबै भाषा र संस्कृतिलाई सरकारले सम्मान गरेको पनि उल्लेख गरे । उनले राष्ट्रिय राजनीतिक मुलधारमा नआएका पार्टीहरूसँग सम्वाद र छलफल गरी राजनीतिक मुलधारमा ल्याउने काम भइरहेको जानकारी दिए ।