मोरङ कारागारभित्र कैदीको शंकास्पद मृत्यु

विराटनगर - जिल्ला कारागार मोरङभित्र गएराती एक कैदीको मृत्यु भएको छ । ६ बर्षदेखि कारागारमा कैद भुक्तान गरिरहेका मोरङको रतुवामाई नगरपालिका–१० साविक इटहरा–८० का ४३ वर्षीय नारायण थापाको मृत्यु भएको निमित्त जेलर राम पोखरेलले जानकारी दिए ।

पेट दुखेपछि उपचारका लागि बिहीबार बिहान कोसी अस्पताल लगिएकोमा उनको मृत्यु भएको जनाइएको छ । उनी जबरजस्ती करणी मुद्दामा १० बर्षका लागि जेल परेका थिए ।

मृतक थापाको शव कोसी अस्पतालमै राखिएको जेलर पोखरेलले बताए । घटनापछि मृतकका आफन्तलाई बोलाइएको उनले बताए ।

थापा यसअघि जेलभित्र बिरामी भएको रेकर्ड नभएको जनाइएको छ । थापाको अचानक मृत्यु भएपछि घटना रहस्यमय रुपमा लिइएको छ । मोरङ कारागारभित्र केही दिनअघि मात्रै कैदीबन्दीहरुको दुई समूहबीच झडप भएको थियो ।

कात्र्तिक मण्डल समूहको नेतृत्वमा चौकीदार किरण गुरुङसहित नाईके र भाईनाइकेहरुलाई नियन्त्रणमा लिएर कुटपिट भएपछि झडप भएको थियो । झडपमा थापा संलग्न थिए थिएनन् भन्ने खुलेको छैन । 

आफन्तहरुले भने गएराती १ बजेतिर नारायणको मृत्यु भएको खबर आएको जानकारी दिएका छन् । मृतकका भाई हरि थापाले घटना थाहा पाएपछि आफूहरु अहिले विराटनगर जाँदै गरेको जानकारी दिए ।