कूटनीतिक कर्मचारी बिनाभिसा ओमान जान पाउने

काठमाडौं : माथिल्लो ओहोदामा बसेका राजनीतिज्ञ र कर्मचारीहरु बिनाभिसा ओमान जान पाउने भएका छन् । नेपाल र ओमानबीच कूटनीतिक, विशेष, सेवाकालीन तथा सरकारी राहदानी बाहकलाई एक-अर्काका मुलुकमा ९० दिनसम्म बिनाभिसा आउजाउ गर्न दिने सहमतिपछि त्यस्तो सुविधा तय भएको हो । ओमानको परराष्ट्र मन्त्रालयमा दुई पक्षबीच सम्झौतामा सोमबार हस्ताक्षर भएको हो । 

परराष्ट्र मन्त्रालयमार्फत पछिल्लो समय सर्वसाधारणको पासपोर्टभन्दा सरकारी तहको पासपोर्टमा नै सुविधा-सम्झौता गर्ने काम भएका छन् । कूटनीतिक र विशेष पासपोर्टमा खासै समस्या हुँदैन तर पनि त्यसमा नै सम्झौता गर्ने र कामको सूचि तय गर्ने कार्य बढेको छ । यद्यपि मन्त्रालयको चाहनाअनुरुप राजदूत तहबाट यो स्तरको कार्य अघि बढ्नु राम्रो हो । सरकारले कूटनीतिक र विशेष पासपोर्टमा भन्दा सर्वसाधारणको पासपोर्टलाई महत्व दिनुपर्ने सुझाव परराष्ट्र भित्रै छ ।

सम्झौताअनुसार उक्त राहदानीबाहक दुवै मुलुकका नागरिककले एक-अर्कामा प्रत्येकपटक प्रवेश गरेको मितिदेखि ९० दिनसम्म प्रवेशाज्ञा नलिईकन प्रवेश गर्न, ट्रान्जिटका रूपमा रहन, बस्‍न तथा त्यहाँबाट प्रस्थान गर्न सक्नेछन् । ओमानका लागि नेपाली राजदूत शर्मिला पराजुली र ओमानका तर्फबाट त्यहाँका परराष्ट्र मन्त्रालयका सचिव (प्रशासन तथा लेखा) मोहम्मद विन नासिर विन मोहम्मद अल वहेबीले सम्झौतामा हस्ताक्षर गरेका हुन् । 

सम्झौतापछि ओमान र नेपालबीच हुने द्विपक्षीय औपचारिक भ्रमण, ट्रान्जिट भ्रमणलगायत अन्य गतिविधि बढाउन सहयोग पुग्ने मस्कटस्थित नेपाली दूतावासले जनाएको छ । त्यसैगरी  पछिल्लो समय ओमान अन्तरराष्ट्रिय विमानस्थल व्यस्त ट्रान्जिटका रूपमा विकास भइरहेका सन्दर्भमा श्रमलगायत अन्य विविध गतिविधिका लागि त्यहाँ हुने भ्रमणमा समेत सो सम्झौताले सहजीकरण गर्ने भएको छ ।