जसपाद्वारा आन्दोलनका कार्यक्रम घोषणा

काठमाडौँ : प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको प्रतिनिधि सभा विघटनविरुध्द जनता समाजवादी पार्टी (जसपा)ले आन्दोलनका कार्यक्रम घोषणा गरेको छ । मंगलबार बसेको केन्द्रीय कार्यकारिणी समितिको बैठकले ४ दिनका लागि आन्दोलनका कार्यक्रम घोषणा गरेको सदस्य मनिष सुमनले जानकारी दिए । 

सुमनका अनुसार बिहीबार पुस ९ गते आन्दोलन तयारी बैठक गर्ने, १० गते देशभरका सबै जिल्लाका सदरमुकामहरूमा राष्ट्रपति र प्रधानमन्त्रीको पुतला दहन गर्ने, ११ गते सबै जिल्ला सदरमुकाममा  मसाल जुलुस निकाल्ने र १२ गते सबै जिल्ला सदरमुकामसहित काठमाडौँमा विशाल जनप्रदर्शन गर्ने निर्णय बैठकले गरेको छ । 

बैठकपछि जारी विज्ञप्तिमा भनिएको छ, 'प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीद्वारा जनताको सर्वोच्च प्रतिनिधि संस्था प्रतिनिधि सभाको असंवैधानिक, अलोकतान्त्रिक र प्रतिगामी निर्णयको जनता समाजवादी पार्टी, नेपाल जोडदार बिरोध गर्दै आन्दोलनका कार्यक्रमहरू तय गरिएको छ ।'