लगानी नउठ्ने डरले आन्ध्र प्रदेशमा टिकट मूल्य बढाउन बल गर्दै ‘आरआरआर’

मुम्बई -‘बाहुबली’ निर्देशक एस एस राजामौलीले निर्देशन गरेको नयाँ फिल्म ‘आरआरआर’ले आफ्नो लगानी नउठ्ने आशंका गर्दै आन्ध्र प्रदेशमा टिकटदर बढाउने पहल थालेको छ । भारतका बाँकी राज्यको तुलनामा आन्ध्र प्रदेशमा टिकट मूल्य कम रहेकाले ‘आरआरआर’ निर्माताले आन्ध्र प्रदेशमा यो फिल्मका लागि टिकटदर बढाउने अभियान थालेका हुन् ।

यसअघि उनीहरुले यसका लागि अदालतमा मुद्दा हाल्ने तयारी गरिरहेको समाचार आएको भए पनि अहिले भने अदालत नगई टिकट मूल्य बढाउन मुख्यमन्त्रीसँग आग्रह गर्ने निर्णय गरेको समाचार आएका छन् । सरकारले केही समयअघि नै ५० प्रतिशत अकुपेन्सीसहित हल खोल्ने निर्णय गर्दा प्रदर्शकले टिकक मूल्य असाध्यै कम भएकाले बढाउन आग्रह गरेको थियो ।

तर सरकारले प्रदर्शको यो मागमा खासै चासो दिएको थिएन । ‘आरआरआर’ निर्माताले अहिले यही माग उठाएका हुन् । आन्ध्र प्रदेश तेलगु सिनेमाको मुख्य बजार हो । तर बाँकी राज्यको तुलनामा यहाँ सिनेमाघरको टिकट मूल्य कम रहेको निर्माता तथा प्रदर्शकको गुनासो रहँदै आएको छ । यहाँ दर्शकले १० रुपैँयादेखि २ सय ५० रुपैँयासम्ममा फिल्म हेर्न पाउँछन् । 

मल्टिप्लेक्समा प्रिमियम टिकटदर २ सय ५० रहेको छ भने डिलक्समा १ सय ५० । इकोनोमी क्लासमा भने दर्शकले ७५ रुपैँयासम्ममा फिल्म हेर्न पाउँछन् । उता नगर पञ्चायतमा भने सबैभन्दा महंगो टिकटको मूल्य नै ३५ रुपैँया छ । नगर पञ्चायतमा बनेका हलले डिलक्समा २५ रुपैँया र इकोनमीमा १५ रुपैँयामा फिल्म देखाउनुपर्ने प्रावधान छ ।

यसैगरी गाउँ पञ्चायतमा बनेका एसी जडित हलले प्रिमियममा २० रुपैँया डिलक्समा १५ र इकोनोमीमा १० रुपैँया लिन पाउँछन् । एसी नभएका हलले भने १५,१० र ५ मा फिल्म देखाउँछन् । ‘आरआरआर’ निर्माताले भने मल्टिप्लेक्समा ५ सय रुपैँया लिन पाउने माग राखेका हुन् । उनीहरुले कम्तीमा पहिलो हप्ता यत्तिको टिकट कायम गर्न मुख्यमन्त्रीसँग आग्रह गर्न लागेका हुन् ।

‘आरआरआर’ लाई अहिलेसम्मको भारतकै महंगो फिल्म मानिएको छ । यो फिल्मको  लगानी ४ सय ५० करोड भारु मानिएको छ । तेलगुमा बनेको यो फिल्म तमिल, हिन्दी र मलयालम भाषामा पनि प्रदर्शन हुँदैछ । फिल्ममा जुनियर एनटीआर, रामचरण, अजय देवगन, आलिया भट् आदि कलाकारको अभिनय रहेको छ । फिल्म जनवरी ७ मा रिलिज हुँदैछ ।