प्रदेश २ मुख्यमन्त्री कार्यालयले साइकल खरिदमा अनियमितता गरेकाे ठहर

जनकपुरधाम - अख्तियार दुरुपयोग अनुसन्धान आयोग बर्दिबासले प्रदेश २ सरकारद्वारा साइकल खरिदमा भ्रष्टाचार भएकाे ठहर गरेको छ । छानबिनका क्रममा बर्दिबासस्थित अख्तियार कार्यालयले गरेको प्रारम्भिक अनुसन्धानबाट सो कारोबारमा अनियमितता देखिएको बर्दिबासका कार्यालय प्रमुख कृष्णप्रसाद सापकोटाले बताए ।

प्रदेश २ को मुख्यमन्त्री कार्यालयद्वारा ‘बेटी बचाउ, बेटी पढाउ’ अभियानअन्तर्गत किनिएको साइकलको कारोबारको विस्तृत अध्ययन गर्न अझै समय लाग्ने उनको भनाइ छ । ‘पहिलो चरणको अनुसन्धान सकिएको छ, जसको प्रारम्भिक अनुसन्धानमा अनियमितता भएको देखिएको छ अब अर्को चरणको लागि छुट्टै अनुसन्धान अधिकृत छनोट गरेर विस्तृत अनुसन्धान प्रक्रिया अघि बढाइएको छ,’ प्रदेश प्रमुख हरिशंकर मिश्रलाई प्रतिवेदन बुझाउन गएका बेला सञ्चारकर्मीहरुसँग कुरा गर्दै उनले भने ।

विस्तृत अनुसन्धानमा पनि अनियमितता देखिएमा भ्रष्टाचार ठहर हुन्छ र तद्अनुरुप कानून बमोजिम कारबाही प्रक्रिया अघि बढाइने उनले जानकारी दिए । भ्रष्टाचार ठहर भएमा सम्बन्धित कर्मचारी, अधिकारी तथा पदाधिकारीमाथि मुद्दा दायर गरेर कारवाही प्रक्रिया थालिने उनले जानकारी दिए ।

सञ्चारकर्मीहरूको जिज्ञासामा विस्तृत अनुसन्धानमा कम्तिमा एक डेढ महिना लाग्ने प्रमुख सापकोटाले बताए । ‘संलग्न कर्मचारी तथा पदाधिकारीको बयान लिने, विभिन्न किसिमको प्रमाण जुटाउने तथा परीक्षणपछि अभियोजन तयार गर्नेलगायतका काम सक्न एक, डेढ महिनासम्म लाग्न सक्छ त्यो छानबीन अधिकारीमा भर पर्छ,’ उनले भने ।

मुख्यमन्त्री 'बेटी बचाउ, बेटी पढाउ’ अभियानअन्तर्गत कक्षा ८ मा अध्ययनरत छात्राहरूलाई वितरणको लागि खरिद गरिएको साइकलमा अनियमितता भएको भन्दै उजुरी परेपछि अख्तियारको टोलीले असोज १३ गते मुख्यमन्त्री कार्यालयमा छापा मारेको थियो । सोही दिन साइकल खरिद तथा वितरणसम्बन्धी सबै फाइल अख्तियारले नियन्त्रणमा लिई अनुसन्धान प्रक्रिया थालेको थियो ।