ओलीलाई कारबाही र आधिकारिक भएको प्रमाण बोकेर दाहाल समूह निर्वाचन आयोग जाँदै

काठमाडौं : नेकपाका अध्यक्षद्वय पुष्पकमल दाहाल र माधवकुमार नेपाल समूहले प्रधानमन्त्री तथा अध्यक्ष केपी शर्मा ओलीलाई कारबाही गरेको पत्र निर्वाचन आयोगमा बुझाउँदै छ । ओलीलाई कारबाही गरेको र आफुहरु नै आधिकारिक नेकपा भएको पत्र साढे १२ बजे निर्वाचन आयोगमा बुझाउने कार्यक्रम रहेको छ ।

आयोगका अनुसार उनीहरुले साढे १२ बजे पत्र लिएर आउने जानकारी गराएका छन् । दाहाल निकट एक नेताका अनुसार सो पत्रमा ओलीलाई अनुशासनको कारबाही गरेर अध्यक्षबाट हटाएर माधवकुमार नेपाललाई अध्यक्ष बनाएको उल्‍लेख छ । त्यस्तै आफुहरु नै आधिकारिक नेकपा भएको प्रमाण पनि लिएर जाँदैछन् ।

त्यस्तै ओली समूहले मंगलबार नै पार्टी केन्द्रीय समिति बिस्तारसम्बन्धी पत्र निर्वाचन आयोगमा दर्ता गराएको छ । ओली समूहको सो पत्रमा केन्द्रीय समिति बिस्तार भएको उल्लेख छ र सँगै विस्तारित केन्द्रीय समितिमा रहेका सदस्यहरुको सूची पनि संलग्‍न छ । त्यो पत्रमा पार्टी अध्यक्ष ओलीको हस्ताक्षर छ । मंगलबार बालुवाटारमा बसेको बैठकले ५५६ नयाँ सदस्य थप गरेको थियो । ओलीले साबिकको ४४७ सदस्यीय केन्द्रीय कमिटीमा ५५६ जना नयाँ सदस्य थपेर ११ सय ९९ सदस्यीय घोषणा गरेका थिए । जसमा १९७ जनापछि थप गर्ने बताइएको छ ।