एबी डिभिलियर्सले लिए सन्यास

काठमाडौँ- दक्षिण अफ्रिकी ब्याट्सम्यान एबी डिभिलियर्सले क्रिकेटबाट सन्यास लिएका छन् । सन् २०१८ मा अन्तर्राष्ट्रिय क्रिकेट त्यागेका एबी डिभिलियर्स फ्रेन्चाइज लिगहरूमा पनि नदेखिने भएका हुन् । ३७ वर्षिय एबी डिभिलियर्सले आफ्नो १७ वर्षे करियरमा ११४ टेस्ट, २२८ ओडीआई र ७८ अन्तर्राष्ट्रिय टी–ट्‍वान्टी खेलेका छन् । 

‘मेरो क्रिकेट यात्रा अत्यन्तै रोचक रह्यो । अब भने मैले सन्यास लिने निर्णय गरेको छु । मैले यो उत्साहपूर्वक खेलेँ । अब भने मसँग यो खेलमा लागिपरिरहने उर्जा बाँकी छैन,’ एबी डिभिलियर्सले भनेका छन् । 

एबी डिभिलियर्सको घोषणासँगै उनको इन्डियन प्रिमियर लिग (आईपीएल)को टिम रोयल च्यालेन्जर्स बेंगलोर (आरसीबी)सँगको यात्रा पनि सकिएको छ । उनले सन् २०११ मा आरसीबीबाट आईपीएल करियरको सुरुवात गरेका थिए । उनले १० सिजन आईपीएल खेलिसकेका छन् । एबी डिभिलियर्सले आरसीबीका लागि १५६ खेल खेल्दै कुल ४ हजार ४ सय ९१ रन बनाएका छन् ।