माओवादी अध्यक्ष दाहाल र अमेरिकी सहायक विदेशमन्त्रीबीच भेट

काठमाडौँ – नेकपा माओवादी केन्द्रका अध्यक्ष पुष्पकमल दाहाल र अमेरिकी सहायक विदेशमन्त्री डोनाल्ड लुबीच भेटवार्ता भएको छ । पेरिसडाँडामा शुक्रबार भएको भेटमा अमेरिकी सहायता परियोजना, मिलिनियमन च्यालेञ्ज कर्पोरेशन (एमसीसी) सम्झौताबारे छलफल भएको दाहालको सचिवालयले जनाएको छ ।

भेटमा नेपाल र अमेरिकाबीचको द्विपक्षीय सम्बन्ध, कोभिड महामारीकालमा अमेरिकाले गरेको सहयोग, अमेरिकामा रहेका नेपालीको रोजगारी तथा सुरक्षाबारे पनि छलफल भएको सचिवालयले जनाएको छ । एमसीसीमा राष्ट्रिय सहमति जुटाएर अघि बढ्ने बताउँदै आएका दाहाल र अमेरिकी सरकारका सहायक विदेशमन्त्रीबीचको भेटलाई चासोका साथ हेरिएको छ ।