‘एनएसजेएफ पल्सर स्पोर्ट्स अवार्ड २०७६’ को सह-प्रायोजन डिस मिडियाले गर्ने

काठमाडौं : नेपाल खेलकुद पत्रकार मञ्‍च (एनएसजेएफ)ले यही पुस २८ आयोजना गर्ने ‘एनएसजेएफ पल्सर स्पोर्ट्स अवार्ड २०७६’ का लागि डिस मिडिया नेटवर्क लिमिटेडसँग सह-प्रायोजन गर्ने सम्झौता गरेको छ । प्रत्येक वर्ष आयोजना हुने अर्वाडको नयाँ संस्करणका लागि मञ्‍चले डिस मिडियासँग सम्झौता गरेको बुधबार जानकारी दिएको हो । 

मञ्‍चले यसअघि नै हंशराज हुलासचन्द एन्ड कम्पनी प्रालीसँग मुख्य प्रायोजकको सम्झौता नवीकरण गरिसकेको छ भने पिपल्स च्वाइस विधाको भोटिङका लागि ई-सेवासँग सम्झौता गरेको छ । 

डिस मिडियाले नगद तथा जिन्सी गरि एघार लाख रुपैयाँ बराबरको सह-प्रायोजन गर्नेछ । जसमा अवार्ड विजेताहरूलाई डिस होमको १३ थान कनेक्सन (दुई वर्षको रिचार्ज सहित), २० जना नोमिनीहरूलाई २० थान डिस होम कनेक्सन (एक वर्षको रिचार्ज सहित) र १३ थान सेट-टप बक्स (दुई बर्षको रिचार्ज सहित) उपलब्ध हुनेछ । यो सम्झौता एक बर्षका लागि रहनेछ । 

खेल क्षेत्रबाट नेपालको नाम राष्ट्रिय तथा अन्तर्राष्ट्रिय क्षेत्रमा चिनाएका खेलाडी, प्रशिक्षक, खेलकर्मी र संस्थालाई मञ्चले ‘पल्सर स्पोर्ट्स अवार्ड’ बाट बर्सेनि सम्मान गर्छ । अवार्डअन्तर्गत पिपल्स च्वाइस विधाको मनोनयन सार्वजनिक भइसकेको छ । यसपटक उक्त विधामा पौडीकी गौरिका सिंह, भलिबलकी अरुणा शाही, बास्केटबलकी सदिना श्रेष्ठ, फुटबलकी सावित्रा भण्डारी र करातेका मण्डेकाजी श्रेष्ठ मनोनयनमा परेका छन् ।

मनोनयनमा परेका खेलाडीबाट विजेता चयन ई-सेवाबाट भोटिङ, फेसबुक लाइक, आयोजक नेपाल खेलकुद पत्रकार मञ्चका सदस्यहरूको मत र राष्ट्रिय खेल संघका मुख्य प्रशिक्षकको मतका आधारमा गरिने छ । 

वर्षका उत्कृष्ट खेलाडी पुरुष, महिला र युवा तथा उत्कृष्ट प्रशिक्षक विधाको मनोनयन केही दिनमै सार्वजनिक गरिने जानकारी मञ्‍चका महासचिव प्रज्जवल ओलीले दिए । लाइफटाइम एचिभमेन्ट अवार्ड, पारा एथलिट, स्पेसल अवार्ड र टिम अफ दी इयर अवार्डको घोषणा अवार्ड कार्यक्रमकै दिन गरिनेछ । त्यस्तै, स्पोर्टस अर्वाडकै दौरान एक अन्तर्राष्ट्रिय खेल पत्रकारलाई पनि सम्मान गर्ने कार्यक्रम छ ।