सुर्खेतबाट काठमाडौं आउँदै गरेको यात्रुबहाक बस दुर्घटना

काठमाडौँ - सुर्खेतबाट काठमाडौं आउँदै गरेको यात्रुबहाक बस दाङमा दुर्घटना भएको छ । दुर्घटनामा २९ जना घाइते भएका छन् । वडा प्रहरी कार्यालय लमहीले दिएको जानकारीअनुसार कर्णाली प्रदेश ०२–००१ ख ०२१९ नम्बरको बस पूर्वपश्चिम राजमार्गअन्तर्गत लमही नगरपालिका-३ नारायणपुरमा गएराति दुर्घटनामा परेको हो ।

घाइतेमध्ये तीन जनाको अवस्‍था गम्‍भीर रहेको प्रहरीले जनाएको छ ।  उनीहरूको कोहलपुर मेडिकल कलेजमा उपचार भइरहेको छ । बसको अगाडिको पट्टा भाँचिएपछि अनियन्त्रित भएर दुर्घटना भएको हो । बसमा ३९ जना यात्रु सवार थिए । चालकलाई प्रहरीले नियन्‍त्रणमा लिएको छ ।