घनेन्द्र ओझाको ‘असमान पहाडहरू’ बजारमा

काठमाडौँ - नेपाली साहित्यका विविध विधामा कलम चलाउँदै आएका घनेन्द्र ओझाको नवीनतम् कविताकृति ‘असमान पहाडहरू’ प्रकाशन भएको छ । समालोचना र पत्रकारितामासमेत सक्रिय ओझाको बाह्रौं पुस्तकका रूपमा प्रकाशन भएको यस कविता संग्रहमा समसामयिक विषयका २१ कविता समाविष्ट छन् । 

कृतिभित्रका कवितामा समाजका बेथिति, कुसंस्कार, राजनीतिक अव्यवस्था र अराजकता, सांस्कृतिक विचलन र सामाजिक विखण्डन, मानवीयतामा ह्रास, प्रकृतिप्रेम, सामाजिक, राजनीतिक नेतृत्वमा भइरहेको नैतिक पतनजस्ता विषय समेटिएको छ ।

युवा साहित्यकार एवम् समालोचक महेश पौड्यालको लामो र विस्तृत भूमिका रहेको यस कृतिको प्रकाशक कवि स्वयम् छन् भने वितरक कन्दरा पब्लिकेसन रहेको छ । पुस्तकको मोल १ सय ५० रूपैयाँ रहेको छ ।