‘आर्सनल रेलिगेसन प्रतिद्वन्द्वी हो’

काठमाडौं : आर्सनल जारी प्रिमियर लिग सिजनमा संर्घषरत छ । लिगका पछिल्ला सात खेलमा पराजित रहेको आर्सनल अंक तालिकामा १५औँ स्थानमा छ । रक्षापंक्तिमा कमजोर देखिएको आर्सनल गोल गर्न र गोलको अवसर सिर्जना गर्ने मामलमा पनि चुकिरहेको छ ।

आर्सनलको लगातारको खराब प्रदर्शनमा मिडफिल्डर र स्ट्राइकरहरुको कमजोर लयलाई पनि कारक मानिदैँछ । त्यसो त आर्सनलमा मेसुट ओजिल जस्ता प्रतिभशाली खेलाडी टिम बाहिर रहेका छन् । जसको अनुपस्थितीले मिकेल आर्टेटाको टिमको एट्याकिङ मिडफिल्ड फिक्का देखिन्छ ।

उनै ओजिलले आर्सनलको खराब लयबारेमा टिप्पणी गरेका छन् । जर्मनीको जर्सीमा विश्वकप जितेका ओजिलले आर्सनलको प्रदर्शनप्रति निराश व्यक्त गर्दै भनेका छन्, ‘म मात्र होइन क्लबलाई माया गर्ने सबैमा निराशा छाएको छ । हामी खराब समयबाट गुज्रिरहेका छौं । म टिम बाहिर छु त्यसकारण म मेरा सहकर्मीहरुलाई सहयोग गर्न सक्दिन । त्यसकारण जबसम्म मैले टिममा खेल्ने मौका पाउँदिन, मैले गर्न सक्न भनेको प्रार्थना मात्र हो,’ ओजिलले भने ।

ओजिल आर्सनलको प्रिमियर लिग खेल्ने टिममा छैनन् । उनको र क्लबको सम्बन्ध चिसिएका कारण, मार्च ६ देखि यता उनले प्रिमियर लिगमा खेल्न पाएका छैनन् । ओजिललाई आर्सनलले पछिल्ला ‘ट्रान्सफर विन्डो’ मा बेच्‍न खोजे पनि सफल हुन सकेन । ओजिलले आउँदो जनवरीको सरुवा बजारमा फेरि आर्सनल छाड्न प्रयास गर्ने सम्भावना छ । आउँदो जुनमा उनी त्यसै पनि फ्रि-एजेन्टका रुपमा लन्डन क्लब छाड्न सक्नेछन् ।

यसैबीच वेस्टबु्रमका प्रशिक्षक साम एलरडाइसले आर्सनल रेलिगेसन प्रतिद्वन्द्वी भएको बताएका छन् । ‘अहिले अंक तालिका हेर्ने हो भने आर्सनल रेलिगेसनमा पर्न सक्ने टिम हो । त्यसकारण, आर्सनल हाम्रा लागि रेलिगेसन प्रतिद्वन्द्वी हो । आर्सनलको आत्मविश्वास कमजोर देखिन्छ । आशा छ हामी उनीहरुलाई पराजित गर्न सक्‍छौं,’ एलरडाइसले भने । आउँदो आइतबार आर्सनलले १९ औ स्थानमा रहेको वेस्टब्रुमको सामना गर्देछ ।