दीपेन्द्र लामाको निर्देशनमा एलिजा र कुन्साङको ‘घुइँचो’

काठमाडौँ - केही दिनअघि मात्र अभिनेत्री एलिजा गौतमले ‘घुइँचो’ खेल्न लागेको समाचार आएका थिए । राम दैलेखीले निर्माण गर्न लागेको यो फिल्ममा एलिजा मात्र फाइनल भएको निर्माण पक्षले जनाएको थियो ।

तर यसको हप्ता दिन नबित्दै निर्माण टिमले एलिजाको जोडी बनेर खेल्ने अभिनेता र निर्देशकको पनि टुंगो लगाएको छ । सोमबार अपरान्ह नयाँ बानेश्वरको एभरेस्ट होटलमा आयोजित कार्यक्रममा निर्माण टिमले एलिजाको जोडीको रुपमा कुन्साङ बोमजन र निर्देशकको रुपमा दीपेन्द्र लामालाई अनुबन्ध गरेको जनाएको हो । 

औपचारिक कार्यक्रममा निर्देशक दीपेन्द्र लामा र कुन्साङ दुवैले ‘घुइँचो’ दर्शकको रुचिलाई मध्येनजर गरी निर्माण गर्ने अपेक्षा व्यक्त गरे । निर्देशक दीपेन्द्र लामाले एलिजा गौतमसँग तेस्रो प्रयासमा सहकार्य जुरेको रहस्य खोले । ‘उहाँसँग काम गर्न भनेर यसअघि पनि दुई चोटि प्रस्ताव आएका थिए । बल्ल तेस्रोमा आएर मौका मिल्यो,’ लामाले भने । 

उनले उद्योगमा फिल्म बन्ने काम तीब्र भए पनि पर्याप्त कलाकार नहुँदा निर्माताले सास्ती भोगेको यथार्थ सुनाउँदै कुन्साङ जस्ता कलाकारको उपस्थितिले निर्माता निर्देशकले रोज्जा कलाकार पाउने बताए । 

एलिजाले यसअघि आफैँले निर्माण गरेको फिल्म ‘अनुराग’बाट उद्योगमा डेब्यु गरेकी थिइन् । उनले पहिलो फिल्मको असफलताले धेरै कुरा सिकाएको बताउँदै हरेक क्षेत्रमा दोब्बर मेहनतका साथ काम गर्ने बताइन् । फिल्मलाई राम दैलेखीले निर्माण गर्नेछन् । फिल्मको सुटिङ फागुनदेखि हुने कार्यक्रममा जानकारी गराइयो ।