प्रियंकाले पतिको थर नलेखेपछि चलेको हल्ला

मुम्बई - बलिउड÷हलिउड अभिनेत्री प्रियंका चोपडाले सोमबार राति ट्वीटर र इन्स्टामा अचानक आफ्नो परिवर्तन गरिन् । प्रियंका चोपडा जोनास नाममा सामाजिक सञ्जाल चलाइरहेकी प्रियंकाले गरेको यो परिवर्तनले धेरै जासुसलाई जिज्ञासु बनायो ।

जासुसहरूले निष्कर्ष निकाले, ‘प्रियंका आफ्ना पति निक जोनाससँग छुट्टिँदैछिन् ।’ सामान्यतया सेलेब्रेटीको सम्बन्ध बिग्रिएको संकेत यस्तै चिजबाट पाइन्छ । उनीहरू सामाजिक सञ्जालमा एक अर्कालाई  पछ्याउन छाड्छन् । भर्खर विवाह सम्बन्धबाट अलग भएका दक्षिण भारतीय कलाकार सामान्था र नागा चैतन्यको विच्छेदको सुरुवात पनि यसरी नै भएको थियो । सामान्थाले नागा चैतन्यलाई इन्स्टामा फ्लो गर्न छाडेको देखेपछि सञ्जालका जासुसले दुवैका बीचमा हार्दिक सम्बन्ध नरहेको खुलासा गरेका थिए ।

यता प्रियंकाले पनि पतिको थर छाडेपछि मंगलबार बिहानैदेखि विच्छेदको हल्ला चल्यो । यो देखेपछि प्रियंकाकी आमा मधु चोपडाले मुख खोलिन् र बजारमा चलेको हल्ला गलत भएको स्पष्टिकरण दिइन् । यता प्रियंकाले भने थाहा पाएर पनि के जवाफ दिइरहनु भनेर वा हो अरु कुनै कारणले हो यसमा प्रतिक्रिया दिनुको साटो ‘म्याट्रिक्स ४’को फस्ट लुक सार्वजनिक गरिन् । हलिउडको व्यापारिक र समीक्षात्मक दुवै रुपमा अत्यधिक सफल फिल्मको शृंखलामा प्रियंका सतीको भूमिकामा छिन् । 
तर सामाजिक सञ्जालका जासुसले पति निक जोनासको थर मात्र छाडेको देखे पनि प्रियंकाले सञ्जालमा आफ्नो थर पनि त्याग गरेकी छिन् । अहिले ट्वीटर र इन्स्टामा उनलाई प्रियंका भनेर मात्र लेखेको देख्न सकिन्छ ।