सरकारको कदमविरुध्द कांग्रेसले सोमबार मुलुकभर प्रदर्शन गर्ने

काठमाडौँ : प्रमुख प्रतिपक्षी दल नेपाली कांग्रेसले के.पी. शर्मा ओली नेतृत्वको सरकारले गरेको प्रतिनिधिसभा विघटनको असंवैधानिक र अलोकतान्त्रिक कदमका विरुद्धमा पुस १३ गते सोमबार १६५ संघीय निर्वाचन क्षेत्रमा क्षेत्रीय कार्यसमितिको आयोजनामा एकसाथ प्रदर्शन गर्ने भएको छ । बिहीबार बसेको केन्द्रीय कार्यसमिति बैठकले १३ गते मुलुकभर आन्दोलन गर्ने  निर्णय गरेको हो ।

'बैठकले नेपाल कम्युनिष्ट पार्टीको के.पी. शर्मा ओली नेतृत्वको सरकारले गरेको प्रतिनिधिसभा विघटनको असंवैधानिक र अलोकतान्त्रिक कदमका विरुद्धमा पुस १३ गते सोमबार १६५ संघीय निर्वाचन क्षेत्रमा क्षेत्रीय कार्यसमितिको आयोजनामा एकसाथ प्रदर्शन गर्ने निर्णय गरेको छ,' बैठकपछि मुख्य सचिव कृष्णप्रसाद पौडेलद्वारा जारी विज्ञप्तिमा उल्लेख छ ।

कांग्रेसमा तत्काल आन्दोलन गर्ने कि, सर्वोच्च अदालतमा पर्को रिटको फैसला आएपछि आन्दोलन गर्ने भन्‍नेमा विवाद थियो । पार्टीको संस्थापन पक्ष सर्वोच्चको फैसला आएपछिमात्रै आन्दोलन गर्ने पक्षमा थिए भने नेता रामचन्द्र पोडेल पक्ष तत्काल अआन्दोलन गर्ने पक्षमा थियो । 

बिहीबारको बैठकमा उपसभापति विमलेन्द्र निधि, केन्द्रीय सदस्यहरू प्रकाशमान सिंह र अर्जुननरसिंह के.सी.ले धारणा राखेका थिए । बैठक दिउसो १ बजे पार्टीको केन्द्रीय कार्यालयमा पुनः बस्‍ने विज्ञप्तिमा उल्लेख छ ।