जनतामा जान डराउनेले आन्दोलन घोषणा गरे : प्रधानमन्त्री

काठमाडौँ : प्रधानमन्त्री केपी शर्मा ओलीले पार्टी भित्र खुट्टा तान्‍ने प्रवृत्तिले देशलाई अगाडि बढाउन बाधा पुगेकाले प्रतिनिध सभा विघटन गर्नुपरेको बताएका छन् । बिहीबार बालुवाटारमा आयोजित आफ्नो समूहको केन्द्रीय कमिटीको भेलालाई सम्बोधन गर्दै आफ्नो समूहको नेकपाको अध्यक्षसमेत रहेका ओलीले पार्टीभित्रको झमेलाका कारण देश हाँक्न बाधा भएकाले संसद विघटन गर्नुपरेको बताएका हुन् । 

अध्यक्ष ओलीले संसद विघटन पछि जनतामा जान डर मान्‍नेहरूले पार्टी फुटाएको पनि बताए ।  सरकारले नयाँ जनादेशका लागि जनतामा जाने घोषणा गर्दा डर मान्‍नेहरूले आन्दोलनको घोषणा गरेको बताए । जनतामा जाँदा डर भएपछि आन्दोलन गर्न लागेको अध्यक्ष ओलीले बताए । 

देशलाई विगार्ने, देशको एकता तोडने र अग्रगमनको बाटोमा जान रोक्नेहरूलाई जनताले मत नदिने पनि ओलीले बताए । जनतामा जान छोडेर आन्दोलन गर्ने कुराको कुनै औचित्य नरहेको उनको भनाइ छ । 

गृहमन्त्रीसमेत रहेका सचिवालय सदस्य रामबहादुर थापाले पार्टीलाई जोगाउन पटकपटक अनुनयविनय गर्दा समेत नसकिएको बताए । अन्तिम समय सम्म पनि प्रयास गर्दा समेत नसकेपछि अहिलेको अवस्था आएको थापाको भनाइ थियो ।