फागुन १३ मा ‘प्रेमगीत ३’

काठमाडौँ - भारतमा ४ करोड रुपैँयामा बिक्रि गरिएको दाबी गरेको फिल्म ‘प्रेमगीत ३’ फागुन १३ मा प्रदर्शनमा आउने भएको छ । निर्माता सन्तोष सेनले फिल्म शिवरात्रीको अवसर पारेर प्रदर्शन गरिने जानकारी गराएका छन् । 

यो फिल्म दुई सरकारी विदामा दर्शक बटुल्ने लक्ष्यसहित प्रदर्शनमा आउन लागेको हो । १७ गते शिवरात्री छ भने त्यसको दुई दिनपछि अर्थात् १९ गते ग्याल्पो ल्होसार छ । महंगो बजेटमा निर्माण भएको फिल्ममा शिव श्रेष्ठ, प्रदीप ख्डका, सुनिल थापा आदि कलाकारको अभिनय रहेको छ । यो फिल्मबाट मनिष राउत र क्रिष्टिना गुरुङले फिल्म यात्राको थालनी गरिरहेका छन् । 

छेतेन गुरुङ र सन्तोष सेन मिलेर निर्देशन गरेको फिल्मलाई छेतेन गुरुङले लेखेका हुन् । उनको केही समयअघि मात्र निधन भएको थियो ।  यही मितिमा ‘लप्पन छप्पन २’ पनि प्रदर्शन आउने चर्चा थियो । तर, यी दुवै फिल्मका वितरक एकै हुन् । यही कारण सम्भवतः यो मितिमा ‘लप्पन छप्पन २’ आउनेछैन ।