यूएई टी-२० लिगमा रिलायन्सको टिम, म्यानचेस्टर युनाइटेडले पनि टिम खरिद गर्नसक्ने

काठमाडौँ- इन्डियन प्रिमियर लिग (आईपीएल)मा मुम्बई इन्डियन्सको स्वामित्व भएको रिलायन्स इन्डस्ट्रिज लिमिटेड (आरआईएल)ले यूएई टी-२० लिगमा पनि टिम खरिद गर्ने भएको छ । सन् २०२२ बाट सुरु हुने भनिएको यो लिगमा कुल ६ टिम हुनेछन् । प्रत्येक वर्षको जनवरी र फेब्रुअरीमा आयोजना हुन भनिए पनि पहिलो संस्करण भने फेब्रुअरीमा–मार्चमा आयोजना हुनेछ । 

‘मुम्बई इन्डियन्सका समर्थक विश्वभर छन् । यो टिमलाई विश्वभरि लोकप्रिय बनाउन सकेकोमा हामी हर्षित छौँ । आशा छ हामीले यूएईमा पनि यस्तै सफल ब्रान्ड सिर्जना गर्न सक्नेछौँ । यूएईकै क्रिकेटमा हामीले योगदान गर्न सक्नेछौँ भन्ने विश्वास पनि राखेका छौँ,’ मुम्बई इन्डियन्सका मालिक आकाश आम्बानीले भनेका छन् । 

इमिरेट्स क्रिकेट बोर्ड (ईसीबी)ले यो लिगका आयोजनाका लागि स्वीकृति दिइसकेको छ । यो लिग सञ्चालनका लागि उच्च स्तरीय समिति पनि बनिसकेको छ । जसमा ईसीबीका उपाध्यक्ष खलिद अल जारुनी, महासचिव मुबासिर उस्मानी र सुभन अहमद छन् । पाकिस्तान क्रिकेट बार्डका पूर्वकर्मचारी अहमद ईसीबीका सल्लाहकार हुन् । 

रिलायन्सबाहेक आईपीएलमा टिम भएको अर्को समूह नाइट राइडर्सले पनि युएईको लिगमा टिम खरिद गर्नसक्ने सम्भावना रहेको बताइएको छ । यसैगरी म्यानचेस्टर युनाइटेडको मालिक ग्लेजर परिवार, बिग बास लिगको सिड्नी सिक्सर र दिल्ली क्यापिटल्सका मालिक किरण कुमार ग्रान्धीले यूएईको लिगमा टिम खरिद गर्नसक्ने ईएसपीएनको दाबी छ ।