बागलुङमा ट्र्याक्टर दुर्घटना हुँदा दुई जनाको मृत्यु

बागलुङ - बागलुङको बलेवामा ट्र्याक्टर दुर्घटना हुँदा दुई जनाको मृत्यु भएको छ । मृत्यु हुने दुवै जना पुरुष भए पनि उनीहरूको पहिचान खुल्न नसकेको स्थानीयबासी भरत पौडेलले जानकारी दिए ।

बागलुङ नगरपालिका–१४ नारायणस्थानको कैयाबाट कुश्मीशेराका लागि हिँडेको ध१च ३६० नम्बरको ट्र्याक्टर कालीगण्डकी करिडोरको बलेवा–कुश्मीशेरा खण्डमा दुर्घटना भएको हो । दुर्घटनामा घाइते भएका १२ वर्षीय सुदीप केसीलाई उपचारका लागि पर्वत सदरमुकाम कुश्माको अस्पताल लैजाने तयारी भइरहेको छ । घटनास्थलमा प्रहरी पुगेको छ । ट्र्याक्टर चालक भने फरार छन् । कैयादेखि करिडोरमा उक्लिने क्रममा ट्र्याक्टर भिरबाट झण्डै २ सय मिटर तल खसेको प्रत्यक्षदर्शीले बताए ।