क्रिसमसमा जित उपहार मागिरहेका प्रशिक्षक

काठमाडौँ : इंग्लिस प्रिमियर लिगका क्लबहरुमा प्रतियोगिता जारी रहँदै प्रशिक्षक बर्खास्ती हुने र नयाँ नियुक्त हुने घटना नौलो होइन । साना मानिएका देखि ठूला भनिएका सबै क्लबमा प्रशिक्षक परिवर्तन गरिन्छ । त्यो पनि सिजनको बीचमै । यस सिजन प्रिमियर लिगमा बर्खास्तीमा पर्ने पहिलो प्रशिक्षक बने, स्लाभेन बिलिच । 
बिलिचले यस सिजन वेस्टब्रुमलाई १४ खेल मात्र खेलाउन भ्याए । लिगमा ‘रेलिगेसन ब्याटल’ बलियो हुँदै गएको अवस्थामा अन्य प्रशिक्षक पनि बर्खास्तीमा पर्ने निश्चित छ । त्यस्तो सम्भावना बोकेका तीन प्रशिक्षकका बारेमा यस आलेखमा विश्लेषण गरिनेछः 

मिकेल आर्टेटा, आर्सनल 
आर्सनलले उनाइ एम्रीलाई बर्खास्ती गरेपछि मिकेल आर्टेालाई क्लबमा ल्याउन धेरै मेहेनत ग¥यो । म्यानचेस्टर सिटीमा पेप ग्वार्डिओलाका सहायक रहेका आर्टेटाले आर्सनलमा आएपछि लन्डन क्लबले सुरुवाती सफलता हासिल नगरेका होइनन् । आर्टेटाले आर्सनललाई एफए कप र कम्युनिटी शिल्ड जिताउँदा, क्लबमा नयाँ युग सुरु भएको मानियो । 

तर आर्टेटाले उही लय कायम राख्न सकेनन् । उनको नेतृत्वमा आर्सनलले फेरी खराब नतिजा निकाल्न थाल्यो । त्यही कारण, जारी लिगमा आर्सनल १४ खेलबाट १४ अंक बटुल्दै १५ औ स्थानमा छ । लिगमा लगातार जित विहिन रहेको आर्सनलले  यसै शनिबार सहरी प्रतिद्वन्द्वी चेल्सीलाई घरेलु मैदानमा स्वागत गर्दा आर्टेटा दबाबमा हुनेछन् । पूर्व क्लब कप्तानको प्रशिक्षणमा रहेको आर्सनल चेल्सी भन्दा ११ अंकले पछि छ । त्यति मात्र होइन, आर्सनलले यो सिजन सन् १९७४/७५ यताकै खराब सुरुवात गरेको छ । १२ गोल गर्दा १८ गोल खाएको आर्सनल रेलिगेसन क्षेत्र भन्दा चार अंकले मात्र माथि छ ।  

आर्सनल सन् १९१२/१३ यता इंग्लिस फुटबलको पहिलो श्रेणीबाट घटुवा भएको छैन । लामो समय पहिलो श्रेणीमा रहेर आफुलाई प्रिमियर लिगको शक्तिमा रुपान्तरण गरेको आर्सनल यस सिजन घटुवामा पर्ने सम्भावना कती छ ? यसै भन्न सकिँदैन । तर क्लब प्रशासन भने डराएको अवस्था छ । त्यसैले होला, आर्सनलले यस सिजन घटुवामा परे खेलाडीहरुको तलब कटौती गर्ने निर्णय लिइसक्यो ।

आर्सनलको घटुवामा पर्ने अवस्था आउनुअघि नै आर्टेटा बर्खास्तीमा पर्ने अनुमान गर्न ग्राहो छैन । उता आर्टेटा भने, क्लबले आफुमाथि विश्वासलाई जारी राखोस भन्ने चाहान्छन् । त्यसो त गत मंगलबार आर्टेटासँग काम गरिसकेका ग्वार्डिओलाले आफ्ना पूर्व सहायकको बचाउ गरे । ‘अहिले साचे जस्तो नतिजा नआए पनि आर्टेटाले आउँदा खेलमा पक्कै राम्रो गर्नेछन् । फुटबलमा क्लबको लय परिवर्तन हुन एक साता समय पर्याप्त हुन्छ । त्यसकारण, आर्टेटालाई विश्वास गरिनुपर्छ ।’ ग्वार्डिओलाले भने । तर खराब नतिजाले निरन्तरता पाए आर्सनल व्यबस्थापनले ग्वार्डिओलाको अनुरोध सुन्ने सम्भावना रहँदैन । 

स्टिभ ब्रुस​, न्युकासल युनाइटेड 
स्टिभ ब्रुस इंग्लिस फुटबलमा घटुवा र बढुवाका बारेमा जानकार छन् । अनि प्रिमियर लिगमा भोगिने उत्तार चढावका विषयमा पनि । प्रिमियर लिग अंक तालिकामा १२ औ स्थानमा रहेको उनी नेतृत्वको न्यूकासल हालै दोस्रो श्रेणीको बे्रन्टफोर्डसँग पराजित हुँदै लिग कपको क्वार्टरफाइनलबाट बाहिरियो । घरेलु कपबाट बाहिरिए पनि न्यूकासल प्रिमियर लिग अंक तालिको मध्यक्रममा रहेकाले उनी दबाबमा रहेको देखिदैनन् । 

तर शनिबार म्यानचेस्टर सिटी र त्यसको केही दिनपछि लिभरपुलको सामना गर्नुपर्ने हुँदा न्यूकासल आउँदा सातामा अंक तालिकामा अहिलेको स्थानबाट झर्ने निश्चित छ । ५९ वर्षिय ब्रुससँग क्लब मालिक माइक आस्ले खुशी भएपनि सर्मथक भने निराश छन् । ब्रुसको खेलाउने शैलीलाई लिएर न्यूकासल सर्मथक ओलाचना गरिरहेका छन् ।  त्यसो त, टिमका महत्वपूर्ण खेलाडी कप्तान जमाल लोसल र एलन सेन्ट माक्सिम कोरोना भाइरस संक्रमणका कारण मैदान बाहिर रहेका कारण पनि ब्रुसले समस्या भोगिरेहका छन् ।

न्यूकासलका खेलाडी प्रशिक्षकसँग खुशी नभएको खबर आइरहेका बेला ब्रुसले भने त्यसको खण्डन गरेका छन् । बे्रन्टफोर्डसँग पराजित भएपछि पत्रकारसँग कुरा गर्दै ब्रुसले सबै खेलाडी आफुसँग खुशी रहेको र आफुले भने बमोजिम नै खेलिरहेको बताएका थिए ।  

क्रिस वाल्डर, सेफिल्ड युनाइटेड
जारी सिजन वेस्टब्रुम भन्दा अर्को कुनै टिमले खराब प्रदर्शन गरेको छ भने, त्यो सेफिल्ड युनाइटेड हो । १४ खेल खेल्दा दुई अंक बटुलेको सेफिल्डले अहिले सम्म प्रशिक्षक क्रिस वाल्डरलाई हटाइहालेको छैन । 

प्रिमियर लिग इतिहासमै खराब सुरुवात गरे पनि सेफिल्डले आफ्ना प्रशिक्षक ५३ वर्षिय वाल्डरमाथि भरोसा राखिरहेको छ । गत सिजन सेफिल्डलाई प्रिमियर लिगमा बढुवा गराउँदै नौऔ स्थान दिलाएका वाइल्डर त्यही सफलताको ब्याजमा टिकिरहेका छन् । तर लिगमा जितविहिन रहेको सेफिल्डले वाइल्डरप्रति कहिले सम्म धैर्यता राख्छ, त्यो जान्न केही खेलको नतिजा पर्खिनै पर्ने अवस्था छ ।

यसै शनिबार सेफिल्डले एभरटनको सामना गर्दैछ भने त्यसको केही दिनपछि बर्नलीसँग आमनेसामने हुनेछ । गत साता ब्राइटनसाग बराबरी खेलेको सेफिल्डले त्यसअघि म्यानचेस्टर युनाइटेडविरुद्धको खेल ३–२ ले गुमाएको थिए । यी दुई खेलको नतिजाका आधारमा वाइल्डरलाई प्रश्न गर्न नमिले पनि चार दिन पछि बर्नलीसँगको खेलले उनको भविष्य तय गर्न सक्नेछ । (एएफपीबाट)