भलिबलका पूर्वमूख्य प्रशिक्षक सुदेश रिमालको निधन

काठमाडौं : भलिबलका पूर्वमूख्य प्रशिक्षक सुदेश रिमालको निधन भएको छ । ब्रेनह्यामरेज भएपछि बाँसबारी न्यूरो अस्पतालमा उपचाररत रिमालको ५६ वर्षको उमेरमा शुक्रबार निधन भएको हो । 

रिमालको सम्मानमा आज (शनिबार) राष्ट्रिय खेलकुद परिषद्ले श्रद्धाञ्जली कार्यक्रम गरेको छ । राष्ट्रिय खेलाडीदेखि मुख्य प्रशिक्षकको जिम्मेवारी सम्हालिसकेका सुदेशको अन्तिम सम्मानमा राखेपले त्रिपुरेश्वरमा श्रद्धाञ्जली सभा गरेको हो । 

त्रिपुरेश्वरस्थित राष्ट्रिय खेलकलुद परिषद्को हातामा कार्यक्रम आयोजना गरी पूर्वमुख्य प्रशिक्षक सुदेशको श्रद्धाञ्जली सभा गरेको हो । यस्तै राष्ट्रिय खेलकुद परिषद्ले आइतबार राखेपमा बिदा दिने निर्णय समेत गरेको छ । 

पर्साको वीरगन्जमा जन्मिनु भएका रिमाल पछिल्लो दुई वर्ष राखेपको नेपाल खेलकुद विज्ञान प्रतिष्ठान (सान) को निर्देशकका रूपमा काम गर्दै आएका थिए । गत वर्ष मंसिरमा सम्पन्न १३औं दक्षिण एसियाली खेलकुदमा भलिबल टोलीको मुख्य प्रशिक्षकसमेत रहेका सुदेशको टोली नेपालले कांस्य पदक जितेको थियो । 

दोस्रो पुस्ताको रुपमा चिनिएका रिमाल २०४० सालपछि करिब एक दशक राष्ट्रिय टोलीका सदस्य रहेर सन १९८६ मा दक्षिण कोरियाको सोलमा भएको एसियाली खेलकुदमा नेपाली टिमको प्रतिनिधित्व गरेका थिए । विभिन्न कोर्स पूरा गरेका रिमालले राष्ट्रिय टोलीको जिम्मेवारी पनि सम्हालेका थिए । 

२०४२ सालमा वीरगन्जमा भएको तेस्रो राष्ट्रिय खेलकुदमा सुदेश नारायणी अञ्चलको टोलीबाट राष्ट्रिय टोलीमा डेब्युु गरेका थिए । ओपन स्पाइकरको पोजिसनबाट खेल्दै आएका सुदेश सन् २०१६ मा भारतमा भएको १२ औं दक्षिण एसियाली खेलकुद (साग) मा नेपाली महिला टोलीले कांस्य पदक जित्दा प्रमुख प्रशिक्षक रहेका थिए । मध्यम प्रदर्शन गर्ने सुदेशको अन्तिम श्रृद्धाञ्जलीमा राष्ट्रिय खेलकुद परिषदका उपाध्यक्षसहित विभिन्न पदाधिकारी, नेपाल भलिबल संघका पदाधिकारी देखी भलिबल खेलाडी उपस्थित भएका थिए ।