कांग्रेस केन्द्रीय सदस्यमा प्रकाश रसाइलीद्वारा उम्मेदवारी घोषणा

काठमाडौँ - प्रकाश रसाइलीले नेपाली कांग्रेसको केन्द्रीय सदस्य पदमा उम्मेदवारी दिने घोषणा गरेका छन् । उनले काठमाडौंमा बुधबार पत्रकार सम्मेलन गरी पार्टीको आसन्न १४ औं महाधिवेशनमा केन्द्रीय सदस्यमा उम्मेदवारी दिने घोषणा गरेका हुन् ।

बझाङबाट महाधिवेशन प्रतिनिधिमा निर्वाचित उनले पार्टीका नेता र साथीहरूसँग छलफल गरी केन्द्रीय कार्यसमितिमा बसेर पार्टीको भावी कार्यदिशाबारे योगदान गर्न सक्छु भन्ने उद्देश्यले उम्मेदवारी दिने निधो गरेको बताए ।

नेपाल दलित संघका पूर्वकेन्द्रीय महासचिव रसाइलीले समावेशी दलिततर्फ केन्द्रीय सदस्यमा उम्मेदवारी दिने घोषणा गरेका हुन् । कांग्रेसमा आमनागरिकका मुद्दा उठाउन आफूले उम्मेदवारी दिएको बताउँदै कांग्रेसले निम्न आय भएका तथा सुकुम्वासी, भूमिहीन, दलित, मजदूर वर्गका मुद्दालाई उठाउनुपर्ने धारणा व्यक्त गरे । ०७४ सालको संसदीय निर्वाचनमा कांग्रेसबाट समानुपातिक संघीय सांसद उनी विद्यार्थी कालबाटै कांग्रेस राजनीतिमा सक्रिय छन् ।