राष्ट्रपति सिको सन्देश बोकेर चिनियाँ नेताहरू आउँदै

सीपीसी अन्तराष्ट्रिय विभाग उपमन्त्री गुओ येझाउ

काठमाडौँ : चिनियाँ राष्ट्रपति सि चिनिफिङको सन्देश बोकेर चिनियाँ कम्युनिष्ट पार्टी (सीपीसी) को एक उच्च स्तरीय राजनीतिक टोली काठमाडौँ आउने भएको छ । सीपीसीको अन्तराष्ट्रिय विभाग उपमन्त्री गुओ येझाउको नेतृत्वमा छ सदस्यीय टोली आइतबार विहान काठमाडौं ओर्लन लागेको नेकपा नेतृत्वले जानकारी दिए।

उनीहरू नेकपाको पछिल्लो अवस्था देखेर मध्यस्तताका लागि पहल गर्न आउन लागेका दुवै खेमाका नेताहरूले बताए । चीनको प्रयास प्रशंसनिय रहे पनि निकै ढिला भैसकेको पनि ति नेताहरूले भने । यसअघि पनि नेकपा पटक-पटक फुटको नजिक पुग्दा चीनको पहलकदमीमा रोकिएको नेकपा नेताहरूले बोल्दै आएका छन् ।

यसपटक चीनको काठमाडौँमा रहेको संयन्त्रले नेकपाको विवाद यो तहमा पुगेको थाहा नै पाएन । यसबारे  चिनियाँ राजदूत होउ यान्छीले समयमा नै विकसित घटना बेइजिङ नपुर्‍याउँदा उनीहरू आउन समेत ढिला भएको चिनियाँ अधिकारीले बताए ।

विकसित राजनीतिक घटनाक्रम अध्ययन गर्न र कम्युनिष्टहरूलाई मिलाउन भन्दै राष्ट्रपति सिको विशेष निर्देशनमा उनीहरू काठमाडौँ आउन लागेका हुन् । विभाजनमा गएको नेकपाको दुवै पक्षका नेताहरूलाई सल्लाह दिँदै एकताकालागि जोड गर्न उनीहरु चार दिन काठमाडौँमा रहनेछन् । उक्त छ सदस्यीय टोलीमा चार जना उच्च राजनीतिज्ञ नै छन भने अन्य दुई सरकारी अधिकारी हुन् । 

भारतीय दैनिक हिन्दुस्तान टाइम्सले चिनियाँ राष्ट्रपतिको आदेशमा चार सदस्यीय राजनीतिक टोली काठमाडौँ आउन लागेको शनिबार लेखेको छ ।  उच्च चिनियाँ राजनीतिज्ञ तथा सरकारी अधिकारी गरेर छ जना आउन लागेकाे उक्त टोलीमा अन्तर्राष्ट्रिय विभाग महानिर्देशक छुइ यान पनि छन् । 

यस्तै प्रकारको टोली नै आएर पहिले नेकपालाई चिनियाँ कम्युनिष्टबारे प्रशिक्षण समेत दिएको थियो । अहिले उक्त टोलीलाई नेकपामा विग्रिएको अवस्था सुधार गर्ने जिम्मेवारी छ । उनीहरू आउने भएपछि राजदूत यान्छीले सबै नेताहरुसँग समय मिलाइ सकेकी छन् ।

राजदूत यान्छीले राष्ट्रपति विद्यादेवी भण्डारी, नेकपा अध्यक्ष द्वय पुष्पकमल दाहाल र माधव नेपाल लगायत नेतालाई भेटिसकेकी छन् । उनले ति सबैकोमा उक्त टोली लिएर जानेछिन् । उनले नै भरपुर नेताहरुसँग छलफल गरिसकेकी छन् । टोली आइतबार आइपुगे लगत्तै दूतावासमा ब्रिफिङ लिनेछन् ।

त्यसपछि भेटघाट थाल्नेछन् । टोलीले राष्ट्रपति, प्रधानमन्त्री  र अन्य नेताहरू भेट्ने छ । ओली खेमाको नेकपा होस या दाहाल नेपाल खेमाको नेकपा दुवै पक्षले यो पहलकदमी ढिला भइसकेको जानकारी उनीहरुलाई दिसके पनि प्रयासका लागि आउन लागेका हुन् ।