माघ ७ गते प्रदेशसभा बैठक बोलाउने प्रदेश १ को निर्णय

काठमाडौं : प्रदेश १ को मन्त्रिपरिषद् बैठकले आगामी माघ ७ गते प्रदेश सभा बैठक बोलाउने निर्णय गरेको छ । आज बिहान बसेको बैठकले आगामी माघ ७ गते हिउँदे अधिवेशन तथा प्रदेशसभा बैठक बोलाउन प्रदेश प्रमुख समक्ष सिफारिस गर्ने निर्णय गरेको छ ।

बैठकले भौतिक पुर्वधार विकास मन्त्रालयबाट प्रस्ताव गरिएको प्रदेश यातायात नियमावली २०७७ स्वीकृत गरी लागू गर्ने निर्णय गरेको छ ।

त्यस्तै आज बिहान प्रदेश १ का मुख्‍यमन्त्री शेरधन राईविरुध्‍द अविश्‍वास प्रस्ताव दर्ता भएको छ । नेकपाका अध्यक्ष पुष्पकमल दाहाल-माधवकुमार समूहका ३७ सांसद्‍ले हस्ताक्षर गर्दै अविश्‍वास प्रस्ताव दर्ता गरेका हुन् ।

अविश्वासको प्रस्तावमा निवर्तमान अर्थमन्त्री इन्द्र आङ्बो छन् भने समर्थक तेह्रथुमका सांसद लक्ष्मण तिवारी छन् । ९३ सांसद रहेको १ नम्बर प्रदेशमा दाहाल-नेपाल पक्षसँग ४० बढी सांसद्‍ छन् । कतिपय दाहाल-नेपालका सांसद्हरु हस्ताक्षर गर्न छुटेको बताएका छन् । अब मुख्यमन्त्री राईको पक्षमा २० जना सांसद रहेका छन् ।

आजै बिहान सामाजिक विकास मन्त्री जीवन घिमिरेसहित सोही मन्त्रालयका राज्यमन्त्री जसमाया गजमेर र उद्योग पर्यटन, वन तथा वातावरण राज्यमन्त्री विजयकुमार विश्वासले राजीनामा दिएका थिए ।

'वर्तमान राष्ट्रिय राजनीतिमा घटेका घटनाक्रमहरुका कारणले गर्दा वर्तमान प्रदेश सरकारको मन्त्री र राज्यमन्त्रीको जिम्मेवारीमा रही काम गर्न असमर्थ रहेकाले राजीनामा दिएका छौँ' उनीहरुले पत्रमा लेखेका छन् ।