आलियाको फिल्ममा हुमाको आइटम

मुम्बई : सञ्जयलीला भन्सालीको फिल्ममा एक्स्ट्रामै किन नहोस् कलाकार देखिन रुचाउँछन् । अझ गीत वा दृश्य छ भने त झन् नाइँ भन्ने कुरै भएन । अरु त अरु भन्सालीको फिल्ममा प्रियंका चोपडाले पनि खुशी खुशी आइटम गरेकी थिइन् । सन् २०१३ मा रिलिज भएको ‘रामलीला’मा प्रियंकाले एउटा गीतमा नृत्य गरेकी थिइन् । भलै त्यो पछि उनले भन्साली कै ‘बाजीराव मस्तानी’मा काम गरिन् ।  

भोलि हुमा कुरेसीले भन्सालीको फिल्म खेल्ने मौका पाउँछिन् कि पाउन्नन् थाहा छैन तर उनले भन्सालीको नयाँ फिल्ममा आइटम गर्ने भएकी छिन् । भर्खरै सुटिङ सकिएको फिल्म ‘गंगुबाइ कठैयाबडी’मा हुमाले आइटम गर्ने खबर छ । फिल्मको शीर्ष भूमिका आलिया भट्टले निर्वाह गरेकी छिन् ।

रेडलाइट एरियाबाट निस्केर गैंगस्टर बन्ने सत्य घटनामा आधारित फिल्ममा हुमाले मुजरा नभइ आइटम गीत नै गर्न लागेको मुम्बईमा अनलाइनमा समाचार छन् । हुमाले पहिलोपल्ट आइटम गीतमा नृत्य गर्न लागेकी हुन् । ‘गैंग्स अफ वासेपुर’बाट चर्चामा आएकी हुमाले भर्खरै लन्डनमा ‘बेल बटम’को सुटिङ सकाएकी थिइन् । 

तर गुंगुबाईको छोराले भने फिल्मको प्रदर्शन रोक्ने माग गर्दै भर्खरै भन्साली, आलिया र लेखकविरुध्द मुद्दा दायर गरेका छन् । यही मंगलबार उनले हालेको मुद्दाको पेशी रहेको छ । छोराले पुस्तकका लेखक जेन बोर्गासको विरुध्दमा पनि मुद्दा हालेका छन् । फिल्म ‘माफिया क्वीन अफ मुम्बई’मा आधारित रहेर बनाइएको हो ।