प्रदेश-१ संसद्को हिउदे अधिवेशन ७ माघमा

मोरङ : प्रदेश-१ संसद्को हिउदे अधिवेशन ७ माघमा बोलाइएको छ । प्रदेश प्रमुख सोमनाथ अधिकारी ‘प्यासी’ले प्रदेशसभाको सातौँ तथा हिउँदे अधिवेशनको बैठक माघ ७ गते अपराह्न २ बजे बस्‍ने गरी बोलाएका हुन् । 

प्रदेश प्रमुख अधिकारीले  नेपालको संविधानको धारा  १८३ को उपधारा (१) बमोजिम बैठक बोलाएको  प्रदेश प्रमुख कार्यालयका प्रवक्ता नरेन्द्रकुमार श्रेष्ठले विज्ञप्ति जारी गरेर जानकारी दिएका छन् ।

प्रदेशसभाको छैटौँ तथा बजेट अधिवेशन गत साउन ९ गते अन्त्य भएको थियो । यसअघि प्रदेश नं १ को मुख्यमन्त्री तथा मन्त्रिपरिषद्को बिहान बसेको बैठकले सो दिनका लागि बैठक बोलाउन सिफारिस गरेको आन्तरिक मामिला तथा कानूनमन्त्री हिक्मतकुमार कार्कीका स्वकीय सचिव रवि खनालले जानकारी दिए । 

प्रदेश १ का मुख्यमन्त्री शेरधन राईविरुध्द बिहानमात्रै अविश्‍वासको प्रस्ताव दर्ता भएको थियो ।