रानीपोखरीको उद्घाटन भोलि

तस्बिर : सरोज बैजु/इकागज

काठमाडौं : राष्ट्रपति विद्यादेवी भण्डारीबाट रानीपोखरीको उद्घाटन भोलि बुधबार हुने भएको छ । पुनः निर्माणको सम्पूर्ण कार्य पूरा गरी पोखरीमा पानी हाल्ने कामसमेत पूरा भएपछि उद्घाटन हुन लागेको हो ।

राष्ट्रिय पुनःनिर्माण प्राधिकरणका सचिव रामकृष्ण सापकोटाका अनुसार रानीपोखरी उद्घाटनको सम्पूर्ण तयारी पूरा भएको छ । प्राधिकरणले जिम्मा पाएको दुई वर्षको अवधिमा पुनःनिर्माण कार्य पूरा भएको हो । यसका लागि करिब २५ करोड रुपैयाँ खर्च भएको छ ।

यसअघि काठमाडौं महानगरपालिकाले यसको पुनःनिर्माण जिम्मा लिएको थियो । पुनःनिर्माण गर्दै जाने क्रममा महानगरले पुरातात्विक सम्पदा मासिने गरी आधुनिक कंक्रिटको प्रयोग गरेपछि विवाद उत्कर्षमा पुगेको थियो । 

मन्त्रिपरिषद्को २०७५ माघ १५ गतेको बैठकले बालगोपालेश्‍वर मन्दिरसहित रानीपोखरीको पुनःनिर्माणसम्बन्धी सम्पूर्ण कार्य प्राधिकरणलाई दिने निर्णय गरेको थियो । 

२०७२ को विनाशकारी भूकम्पका कारण बालगोपालेश्‍वर मन्दिर भत्किएको थियो । विवादअघि समग्र रानीपोखरीको पुनःनिर्माण दुईवटा प्याकेजमा गरिएको थियो । महानगरपालिकाले बगैंचा, पर्खाल र पोखरीको जिम्मा पाए पनि काम गर्न सकेन । त्यस्तै बालगोपालेश्‍वर मन्दिरको पुनःनिर्माण मल्लकालीन ग्रन्थकुट शैलीमा गर्ने कि राणाकालीन गुम्बज शैलीमा भन्‍ने विवाद थियो ।
पछि मन्त्रिपरिषद्ले सम्पूर्ण जिम्मा प्राधिकरणलाई दिएपछि यसको विवाद अन्त्य भएको थियो ।

खानेपानी सचिव माधव बेलबासेका अनुसार रानीपोखरीमा आवश्यक पर्ने सम्पूर्ण पानी हालिएको छ । उनका अनुसार रानीपोखरीमा झन्डै चार करोड लिटर पानी जम्मा गरिएको छ ।