प्रधानमन्त्री कपमा लुम्बिनी र एपीएफको विजय यात्रा जारी

काठमाडौं : प्रधानमन्त्री कप राष्ट्रिय महिला क्रिकेट प्रतियोगितामा लुम्बिनी प्रदेश र विभागीय टोली एपीएफले आफ्नो विजय यात्रा जारी राखेका छन् । दाङमा जारी प्रतियोगिताअन्तर्गत आइतबार भएका खेलमा लुम्बिनीले कर्णाली प्रदेशलाई नौ विकेटले पराजित गर्‍यो भने एपीएफले प्रदेश-२ माथि आठ विकेटको जीत दर्ता गर्‍यो । 

जितसँगै लुम्बिनी र एपीएफ समान दुई खेलबाट चार-चार अंक बनाउँदै समूह ए को शीर्ष दुईमा छन् । त्यस्तै, प्रतियोगिताको दोस्रो दिन पनि जीतविहिन रहेका कर्णाली र प्रदेश-२ अंक तालिकाको पुछारमा छन् । 

दिनको पहिलो खेलमा कर्णालीले टस जित्दै ब्याटिङ रोज्यो । तर कुनै पनि ब्याट्सवुमनले दोहोरो अंक नछुँदा कर्णालीले १३ ओभरमा ६ विकेटको क्षतिमा ३४ रन मात्र बनाउन सक्यो । कर्णालीका लागि दिक्षा पुरीले सर्वाधिक आठ रन बनाइन् भने अंशु शाक्यले अविजित सात रन बनाइन् । 

कर्णलीलाई सस्तोमा समेट्न लुम्बिनीकी कप्तान नेरी थापाले दुई विकेट लिइन् भने सरिता जिसी र गिता गोसाइले एक-एक विकेट लिए । जवाफी ब्याटिङमा उत्रेको लुम्बिनीले ३.१ ओभरमा एक विकेटको क्षतिमा लक्ष्य पूरा गर्‍यो । 

दोस्रो खेलमा प्रदेश-२ ले टस जित्दै ब्याटिङ रोज्दा निर्धारित २० ओभरमा आठ विकेटको क्षतिमा ७२ रन बनायो । लगातार दोस्रो पराजय भोगेको प्रदेश-२ का लागि ओपनर शोभा आले र अनुराधा चौधरी बाहेकले दोहोरो रन बनाउन सकेनन् । 

आलेले २३ बलको सामना गर्दा १३ रन बनाइन् भने चौधरीले ३४ बलमा १८ रन बनाइन् । उता ज्योति पाण्डे र कप्तान सिता राना मगरले क्रमशः ३० रन र १८ रन बनाउँदा एपीएफले १३.१ ओभरमा दुई विकेट गुमाउँदै लक्ष्य पूरा गर्‍यो ।