ताजा जनादेश उपयुक्त विकल्प र अवसर : कमल थापा

वीरगंज : राष्ट्रिय प्रजातन्त्र पार्टीका अध्यक्ष कमल थापाले मुलुकले भोग्‍नु परेको संकट अनि व्याप्त कुशासन र भ्रष्टाचारको अन्त्यका लागि ताजा जनादेशमा जानु उपयुक्त विकल्प र अवसर भएको बताएका छन् । आइतबार पर्साको वीरगंजमा आयोजित विरोध प्रदर्शन पछि कोणसभालाई सम्वोधन गर्दै थापाले अदालतमा भएको बिषयमा धेरै चर्चा गर्नु सान्दर्भिक नहुने बताए । 

सरकारले काम गर्न नसकेको, कुर्सी, सत्ता र भ्रष्टाचारको भागबन्डाका कारण देश र जनताले संकट भोग्‍नु परिरहेको थापाको भनाइ छ । पुष्पकमल दाहाल र केपी शर्मा ओलीको झगडा जनता र देश हितको लागि नभइ भागबन्डा र स्वार्थमा केन्द्रित भएको थापाले बताए । नेकपाभित्रको अन्तरविरोध र कलहको बोझले देशलाई दुर्घटना उन्मुख बनाएको थापाको टिप्पणी थियो । 

व्यक्ति परिवर्तनले समस्या समाधान नहुने भन्दै थापाले गलत नीति र बाटोमै परिवर्तन गर्नुपर्नेमा थापाले जोड दिए ।  आफू राप्रपालाई सहयोग गर्नुस् भन्‍न आएको भन्दै थापाले भने, 'हामी आफै देश बनाउन सक्छौ, राप्रपा लाई विश्‍वास गर्नुस हिन्दुराष्ट्र दिन्छौ, राजसंस्था दिन्छौ। विकास र समृध्दि दिन्छौ।' 

थापाले  निरंकुश राजतन्त्र खोजेको नभइ राजादेखी नेत्रविक्रम चन्द समूह, काङ्ग्रेस कम्युनिस्ट, मधेशवादी सबै अट्ने व्यवस्था राप्रपाको चाहना भएको बताए । कार्यक्रममा नेता राजिब पराजुलीले मधेश र मधेसी जनताको हक हित र विकासको निमित्त राप्रपा नै आवश्यक भएको बताए ।

कार्यक्रममा विभिन्‍न पार्टी परित्याग गरि राप्रपा प्रवेश गर्नेलाई अध्यक्ष थापाले स्वागत गरेका थिए ।