अन्ततः नेपाली क्रिकेट टिमले मुख्य प्रशिक्षक पाउँदै

काठमाडौँ- डेभ ह्वाटमोरले राजीनामा दिएपछि रित्त भएको नेपाली राष्ट्रिय क्रिकेट टिम (पुरुष)को मुख्य प्रशिक्षकको खोजी सुरु भएको थियो । गत कात्तिकमा नेपाल क्रिकेट संघ (क्यान)ले नयाँ मुख्य प्रशिक्षकका लागि आवेदन खुलाएको थियो । त्यसपछि कुल ६० जनाले क्यानमा आवेदन दिएका थिए । 

मुख्य प्रशिक्षक छनौट गर्न बनेको कार्यवहाक सचिव प्रशान्त विक्रम मल्लको नेतृत्वमा बनेको समितिले ६० जनामध्येबाट पाँच जनाको अन्तवार्ता लिएको थियो । पाँच जनाको सूचीमा रहेकमध्ये पुबदु दसानायके र मोन्टी देसाईलाई सम्भावित मुख्य प्रशिक्षकका रुपमा हेरिएको छ ।  

क्यान स्रोतका अनुसार यी दुईलाई मुख्य प्रशिक्षक बन्न प्रस्ताव पठाइएको छ । मुख्य प्रशिक्षक बनेपछि उनीहरूले पाउने सुविधाका विषयमा जानकारी गराउँदै प्रस्ताव पठाइएको बताइएको छ । पुबदु नेपाली क्रिकेटका लागि पुरानै नाम हो । उनी सन् २०११ देखि २०१५ सम्म नेपालको मुख्य प्रशिक्षक थिए । देसाई कुनै समय नेपाली टिमका ब्याटिङ कन्सल्टेन्ट थिए ।