रोहित प्रमाणित कप्तान हुन्ः गांगुली

काठमाडौँ- विराट कोहलीले गत महिना भारतको टि–ट्‍वान्टी क्रिकेट टिमको कप्तानीबाट राजीनामा दिए । त्यसपछि टि–ट्‍वान्टी टिमको जिम्मेवारी रोहित शर्माको काँधमा पुग्यो । चार दिनअघि रोहितलाई ओडीआई टिमको जिम्मेवारी पनि दिइयो । 

भारतीय क्रिकेट बार्ड (बीसीसीआई)ले रोहितलाई टि–ट्‍वान्टी र ओडीआईको कप्तानमा नियुक्त गरेपछि सौरभ गांगुलीले प्रश्नहरूको सामना गर्नु पर्‍यो । प्रष्टीकरण दिँदै गांगुलीले रोहित हरेक कोणबाट कप्तानका लागि उपयुक्त उम्मेदवार रहेको बताएका छन् । 

‘छनौटकर्ताले रोहितलाई त्यत्तिकै छानेका होइनन् । उनी टि–ट्‍वान्टी र ओडीआई टिमको कप्तान बन्‍न हरेक हिसाबले सक्षम छन् । उनी आफ्नो जिम्मेवारीमा खरो उत्रनेछन् भन्‍नेमा शंका छैन, ’ गांगुलीले भारतीय सञ्चार माध्यमहरूसँग भनेका छन् । 

मुम्बई इन्डियन्सलाई पाँच पटक इन्डियन प्रिमियर लिग (आईपीएल) जिताइसकेका रोहित प्रमाणित कप्तान रहेको गांगुलीको भनाइ छ । ‘उनकै कप्तानीमा भारतीय टिमले एसिया कप जितेको थियो । त्यो टिममा कोहली थिएनन् । कोहलीबिना उपाधि जित्नु कम गाह्रो थिएन । रोहितको कप्तानीमा भारतीय टिमले फेरि पनि उपाधि जित्न सक्छ । अनि यो टिममा स्तरीय खेलाडीको कमी छैन । यसकारण हामी सबै उत्साहित छौँ,’ गांगुलीले भनेका छन् ।