सरेको सरै ‘सत्यम्’, राजेश हमाल प्रदेश प्रदेशमा, अनुप ‘लाखे’मा

काठमाडौँ - एक वर्ष हुन लागिसक्यो फिल्म ‘सत्यम्’को चर्चा हुन थालेको । अभिनेता राजेश हमाल यो फिल्ममा अनुबन्ध भएको समाचार सार्वजनिक भएसँगै यो फिल्मको चर्चा चुलिएको थियो । यसबाहेक कहिले कलाकार अनुबन्धका समाचार त कहिले अडिसनका खबरले पनि यो फिल्मलाई बासी हुन दिएनन् ।

फिल्म खेल्ने भनेर कार्यशालामा पनि सहभागी भएकी मलिका महतले अचानक यो फिल्म छाडेपछि यो फिल्म फेरि एक पटक मिडियामा छाएको थियो । तर रंग बजारमा भने राजेश हमालदेखि पल शाहसम्मले पनि यो फिल्म छाडेका खबर आएका थिए । 

यस्तो विवादपछि निर्माण टिमले आफूहरू सुटिङमा जान ठिक्क परेको र तिहार लगत्तै फ्लोरमा जाने जवाफ दिएको थियो । तिहार बितेको नै डेढ महिना भइसक्यो तर यो फिल्म फ्लोरमा जाने सुरसार छैन । पछिल्लो समय पुस १ देखि यो फिल्म फ्लोरमा जाने चर्चा थियो तर यो मितिमा पनि फिल्म फ्लोरमा जाने संकेत छैन ।

यही बेला राजेश हमाल गायक गायिका र नृत्यांगनाको नेतृत्व गर्दै ७ प्रदेश घुम्न निस्किएका छन् भने फिल्मका अर्का मुख्य कलाकार अनुपविक्रम शाही नयाँ फिल्म ‘लाखे’लाई समय दिन थालेका छन् । ‘लाखे’ फिल्मको पुसको दोस्रो साताबाट सुटिङ सुरु हुँदैछ । सामान्यतया वर्कसप त्यतिबेला गरिन्छ जब फिल्म फ्लोरमा जान तयार हुन्छ । तर यो फिल्म त वर्कसप झन् सुस्ताएको महसुस हुन्छ ।