जनता प्रतिनिधि सभा विघटनविरुध्द उर्लिए : कांग्रेस

काठमाडौँ : प्रमुख प्रतिपक्षी दल नेपाली कांग्रेसले पार्टीले आज मुलुकभरका १६५ प्रतिनिधि सभा निर्वाचन क्षेत्रमा गरेको प्रदर्शनमा भएको जनताको सहभागिताले प्रतिनिधि सभा विघटन अनअपेक्षाविपरीत भएको पुष्टि भएको बताएको छ । 

मुलकभरको प्रदर्शन देखिएको जनसहभागिताले प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको प्रतिनिधि सभा विघटन असंवैधानिक र अलोकतान्त्रिक कदम भएको सभापति शेरबहादुर देउवाले विज्ञप्ति निकालेर उल्लेख गरेका छन् । 

‘प्रदर्शनले के.पी. शर्मा ओलीको नेतृत्वमा रहेकोे नेकपाको सरकारले गरेको संसद विघटनको असंवैधानिक र अलोकतान्त्रिक कदम, सर्वसत्तावाद, कुशासन एवं  भ्रष्टाचार विरुद्ध जनभावना अभिब्यक्त गरेको छ,’ देउवाद्वारा जारी विज्ञप्तिमा उल्लेख छ । 

प्रतिनिधि सभा विघटनको असंवैधानिक र अलोकतान्त्रिक कदमविरुध्द आयोजित विरोध प्रदर्शन व्यापक सहभागिता साथ सफलतापूर्वक सम्पन्न भएको देउवाले विज्ञप्तिमा उल्लेख गरेका छन् । 

प्रदर्शनमा सहभागी सबैमा पार्टीका तर्फबाट देउवाले आभारसमेत प्रकट गरेका छन् । त्यस्तै देउवाले प्रदर्शन सफल बनाउन अहोरात्र खट्ने सबैलाई धन्यावादसमेत दिएका छन् ।