मलाई रामचन्द्र पौडेल र शशांकको समर्थन छ : शेखर कोइराला

फाइल फोटो

काठमाडौँ : नेपाली कांग्रेस सभापतिका उम्मेदवार शेखर कोइरालाले भागबन्डा, गुटबन्दीरहित कांग्रेस बनाएर सबैलाई समेट्दै तीनवटै तहको निर्वाचन जित्ने गरि अघि बढ्ने बताएका छन् । आइतबार काठमाडौंमा पत्रकार सम्मेलन गर्दै कोईरालाले अनुभव र उर्जाले भरिएको आफ्नो टिमलाई जिताउन आग्रह गर्दै महाधिवेशनपछि सबैलाई समेटेर तीनवटै तहका निर्वाचन जित्ने गरी अघि बढ्ने बताएका हुन् ।

उनले आफुलाई वरिष्ठ नेता रामचन्द्र पौडेल, शंशाक कोईरालाको साथ रहेको दावी गरेका हुन् । उनले अहिले पार्टीभित्र नेतृत्वका लागि समूह देखापरेपछि महाधिवेशनपछि कांग्रेस एक ढिक्का हुने बताए । उनले आफुले नयाँ कार्यक्रम, नयाँ विचार, नयाँ सोचका पार्टीलाई एकतावद्ध भएर अघि बढाउने धारणा राखे । 

पत्रकार सम्मेलनमा कांग्रेसको महामन्त्रीका उम्मेदवार गगन थापाले युवालाई जोड्ने संकल्पका साथ कोइरालाको प्यानल रोजेको बताए । उनले एमालेजस्तो गोजीबाट नाम निकालेर पदाधिकारी चयन गर्ने पार्टी कांग्रेस नभएको भन्दै लोकतान्त्रीक पार्टीभित्र निर्वाचनको परिणामलाई स्वीकार गर्नुपर्ने बताए । उनले सभापतिमा निर्वाचित भएको दिनबाट गुटको नभई सिंगो कांग्रेसको सभापति बन्न कोईरालालाई सुझाव दिए ।