गण्डकी प्रदेश सभाको विशेष अधिवेशन २१ पुसमा

पोखरा : गण्डकी प्रदेश सभाको विशेष अधिवेशन २१ पुसबाट सुरु हुने भएको छ । प्रदेश प्रमुख अमिक शेरचनले २१ गते साढे १ बजेका लागि विशेष अधिवेशन बोलाएका हुन् । 

प्रदेश सभा सचिव हरिराज पोखरेलका अनुसार विशेष अधिवेशनबारे आइतबार ४ बजे सूचना प्रदेश सभामा पुगेको थियो । ठाउँ यकिन नगरिएपनि समय यकिन गरेर चिठी पाएको उनको भनाइ छ । ‘आइतबार ४ बजे हामीलाई चिठी आएको छ, ठाउँ भने यकिन गरिएको छैन,’ उनले भने । 

प्रदेश सभाको विशेष अधिवेशन पोखरा सभागृहमा गर्ने बारे छलफल गरिएको छ । कोभिड प्रोटोकल अनुसार शारीरिक दूरी कायम गर्न सभागृहमा गर्ने बारे छलफल भएको पोखरेलले बताए । ‘प्रमुख सचिवसँग कुरा गरेका थियौं, सभागृहमा गर्दा पैसा बढी आउँछ तर दूरी कायम गर्न सहज छ, त्यसबारे मंगलबार निर्णय हुन्छ,’ उनले भने । 

विशेष अधिवेशन माग गर्दै प्रमुख प्रतिपक्षी दल नेपाली कांग्रेस र जनता समाजवादीले मंसिर ३० गते प्रदेश प्रमुखलाई माग पत्र बुझाएका थिए । 

संयुक्त मागपत्रमा नेपाली कांग्रेसका १५ र समाजवादी पार्टीका २ सांसदले हस्ताक्षर गरेका थिए । संविधानको धारा १८३ अनुसार एक चौंथाइ सांसदले माग गरे विशेष अधिवेशन डाक्नुपर्ने प्रावधान छ । 

गण्डकी प्रदेशमा कांग्रेससँग अधिवेशन माग गर्न आवश्यक पर्ने एक चौंथाइ अर्थात् १५ सांसद छन् । तर उसले २ सांसद भएको समाजवादीलाई साथमा लिँदै अधिवेशनको माग गरेको थियो ।

गण्डकी प्रदेश सभाको छैटौं अधिवेशन जेठ ११ मा सुरु भएर असोज २६ गते सकिएको थियो ।