सरकारविरुध्‍द विप्लवसहित चार पार्टीबीच संयुक्त मोर्चा निमार्ण गर्ने सहमति

काठमाडौं : चार पार्टीबीच संयुक्त मोर्चा निमार्ण गर्ने सहमति भएको छ । विप्लव समूहका महासचिव नेत्रविक्रम चन्द विप्लव, वैद्य समूहका महासचिव मोहन वैद्य किरण, नेकपाका ऋषिराम कट्टेल र वैज्ञानिक समाजवादी कम्युनिस्ट पार्टी नेपालका संयोजक आहुति समूहबीच संयुक्त मोर्चा निर्माण गर्ने सहमति गरेका हुन् ।

'वर्तमान दलाल तथा प्रतिक्रियावादी ससदीय व्यवस्था र नेपाली श्रमजीवि जनताबीचको अन्तरविरोध चर्कंदै गएको छ । दलाल तथा प्रतिक्रियावादी पुँजीवादका विभिन्‍न गुटहरुका बीचमा पनि अन्तरविरोध चर्कंदै गएको छ' जारी विज्ञप्‍तिमा भनिएको छ 'दलाल तथा प्रतिक्रियावादी सत्ता, व्यवस्था र सरकारमा आएको गम्भीर संकटलाई फासीवादी तरिकाले हल गर्ने दुष्प्रयासस्वरुप तथा वैदेशिक शक्तिको आड भरोसा र इसारामा केपी सरकारले संसद विघटन गरेको हो ।'

प्रधानमन्त्री केपी शर्मा ओलीको कदम निरकुश एवं फासिवादी सरकार र उनको पार्टीको आन्तरिक मामिला नभएर दलाल तथा प्रतिक्रियावादी संसदीय व्यवस्थाको असफलताको द्योतक भएको विज्ञप्तिमा उल्‍लेख छ । 'अहिले देश र जनताले भोगेका समस्याहरुको वास्तविक जनपक्षीय समाधान संसद्‍ पुनस्थापना वा मध्यावधि निर्वाचन वा यसै व्यवस्थाभित्र केवल सरकार परिवर्तन मात्र गरेर हुन सक्दैन । यसका लागि दलाल तथा प्रतिक्रियावादी राज्यसत्ताको अन्त्य र संघीय जनगणतन्त्र/वैज्ञानिक समाजवादको स्थापना हुनुपर्छ ।'