वाग्मती प्रदेशका उपनेता जम्कट्टेल र सचेतक माझीलाई हटाइयो

काठमाडौं : नेकपा वाग्मती प्रदेशका दलका नेता तथा मुख्यमन्त्री डोरमणि पौडेलले उपनेता र सचेतकलाई जिम्मेवारीमुक्त गरेका छन् । पौडेलले आफू पक्षीय सांसदहरूको बैठक बोलाएर उपनेता शालिकराम जम्कट्टेल र सचेतक बुध्दिमान माझीलाई पदमुक्त गरेका हुन् । 

उपनेताबाट हटाइएका जम्कट्टेलले आफूलाई पदबाट हटाएको औपचारिक जानकारी आइनसकेको तर, सुनेको बताए । ‘हटाएको भन्‍ने सुनेको छु । तर, औपचारिक जानकारी आएको छैन,’ जम्कट्टेलले इकागजसँग भने । 

जम्कट्टेलले आफूहरूले यसअघि नै पौडेललाई दलको नेताबाट हटाएर अष्टलक्ष्मी शाक्यलाई बनाइसकेकाले हटाउनुको कुनै अर्थ नरहेको बताए । जम्कट्टेल वाग्मती प्रदेशका आन्तरिक मामिला तथा कानुनमन्त्रीसमेत हुन् ।